Nun quixe ser parcial col comentariu anterior y decidí ver otru telediariu de la cadena estatal nun fuera yo a tar enquivocáu colo de la «manipulación». Asina, entré nel canal «24 horas» y tuve un cachu frente a la tele. Más de lo mesmo, españolismu asgaya como si la economía fueren otres olimpiaes. Al poco cambiaron pa internacional y seguí mirando. Loor a la «rancia» alemanona que nos fai la vida imposible, pero como ye la «patrona» que manda sobre Rajoy hai que poner que lo qu’ella diz ye lo bono, y por eso lo cumplimos. Nada del cuestionamientu internu de la Merkel, nin de que ta perdiendo toles eleiciones rexonales nel so país. Non, les recetes suyes son lo meyor de lo meyor. Llueu atrévense a dicir al final: «Mientras tanto, Francia sigue sin despuntar».
Casualmente taba yo lleendo una información que me llegó per Internet, onde se comenten les primeres medíes que tomó Hollande en Francia: 1) Supresión y subasta de tolos coches oficiales. Colo recaudao créase un Fondu d’Axuda a les ciudaes con suburbios más probes. 2) Abolición de los «vehiculos d’empresa» de toles entidaes públiques y organismos dependientes de l’Alministración. Coles perres recuperaes pónense en marcha un númberu importante d’institutos d’investigación científica que van dar trabayu a dos mil quinientos científicos mozos. 3) Xuba de más del 75% d’impuestos a les families que ganen más de 5 millones d’euros al añu. 4) Recorte a la Ilesia de más de 2,8 millones d’euros de subvenciones a colexos pa ricos, con eses perres constrúyense Xardinos d’Infancia públicos y Escueles primaries. 5) Creación del «bonu-cultura» presidencial, quitando impuestos a los que se
constituyen en cooperativa o creen una llibrería con dos llicenciaos desempleaos. 6) Cambiu del modelu de subvenciones a editoriales, revistes y fundaciones, sutituyéndolu por «comités d’emprendedores estatales», que financien actividaes culturales presentando un plan de negociu arreyáu a estratexes modernes de mercáu. 7) Un pautu colos bancos que quieran xuntase a dar créditos «blandos» a empreses franceses que produzan bienes, a cambiu de beneficios fiscales… Y unes cuantes medíes más qu’allargaríen demasiao esti comentariu. ¿Resultáu? El diferencial colos bonos alemanes descendió hasta 101 (nosotros andamos por más de 550) La competitividá de la producción nacional medró por primer vez dende hai 3 años. La inflación caltiense nos mesmos términos. Pero eso sí, como dicen los manipuladores, «Francia no despunta». Pese a ello, a un dan-y ganes de facese ciudadanu francés: «¿Ónde apunten?»
