Tengo de ser mui torpe, pero a esti altor de la película entovía nun fui a enterame si la visita de Rajoy al Papa fue oficial o privada. Si fue oficial, o seya que Rajoy se presentare «sacando pechu» delantre de Francisco y esi Bertone, qu’abúltame qu’entovía anda perellí, diciéndo-yos: «¡Hola, tíos, vengo como «Presi» del Gobiernu d’España, en nome de tolos españoles, a ver lo que se cuez perequí y a saludar a esti santu que-y tocó un «panchu» tremendu!» Y llueu, charra que te charra sobre les coses que nos esmolecen y eso, y más llueu, atropando a la prensa y empobinándose al Pueblu Español, diciéndonos: «Tranquis, tíos, esti paisanu ye distintu y va poner a la Ilesia y a la Conferencia Episcopal Española pates p’arriba, y patatín y patatán, y eso. Pero non. Nun sabemos si sacó pechu, pero depués de la charra, coló d’ellí col rabu ente les pates (ye una metáfora, claro) ensin querer dicir nin rispiu. O seya que pue que la cosa, la visita y eso, fuere privada. En plan fiel católicu militante, o oveya descarriada, vete tu a saber, pero eso sí, llantándose de xinoyos en suelu y besándo-y la mano, porque me paez qu’agora nun se lleva lo del aniellu espiscopal. Agora bien, si la cosa fue asina y el viaxe fue priváu ¿a qué bien toa esa «fanfarria» con gaita y tambor del gobiernu, el PP y los «medios» en xeneral y en particular? Ye como si fuere a ver a la tía Engracia, que vive en Valporquero, suponiendo que Rajoy tuviere una tía que se llamare Engracia y viviere ellí onde la cueva.
En cualquier casu, y al marxe del misteriu de la «oficialidá» (¡arreniego del demoniu!) lo que me sosprendió dafechu eleváu al cubu, fue’l conteníu del susodichu alcuentru vaticanu. De mano, fue cronometráu, como si se tratare d’una preba Olímpica: los doscientos metros de despachu papal: Carrera d’ostáculos. Y nun toi falando en broma. Tolos periódicos dicen que s’allargó per 24 minutos. Non 23 ó 25, xustamente 24. Home, eso d’entrar mirando’l reló paez una falta respetu, ye como si yá llegares con prisa. A un alcuentru d’esi altor hai qu’entrar ensin relós. Oye, lo que dure. Pero lo más simpático, y esto dígolo daveres porque me reí muncho, fue’l cuestionariu que trataron los dos «mandatarios» (o «mandamases») nesos 24 minutos. Al dicir de la prensa, porque a mi nun me dexaron entrar, falaron de: «la difícil situación económica y financiera mundial a la que se enfrenta España»; «la situación en Latinoamérica»; «el paro juvenil y las instituciones españoles»; «la familia»; «el matrimonio homosexual»; «la educación religiosa» , y tengo mieu
que se m’escaeciere dalgún tema. Xunto a esto, hubo tiempu tamién pa que-y regalaren a S.S. un facsimil del llibru De Aetatibus Mundi Imagines, un best-seller del añu 1500, y una camiseta sudada de la Seleición Española. Digo sudada porque tien más méritu. Bien. Persabiendo que la lluz viaxa a una velocidá aprosimada de 300.000 km/s, somos a deducir que, en 1 segundu, podría dar siete vueltes y media a la Tierra (mirélo en wikipedia), que debió ser, más o menos, la velocidá a la que falaron los dos próceres nel Vaticanu, de xuro cola axuda del Espíritu Santu. Toi viéndolos: Bertone llanza’l tema: «Llatinoamérica». Francisco: «Bien». Rajoy: «Regulín». Otru tema: «Matrimoniu homesexual». Francisco: «mal». Rajoy: «Regulín» (nunca nun se compromete)… Agora tírame la camiseta, non, el llibru nun lu tires que s’esfarrapla, y asina hasta 24 minutos bien cuntaos.
A mi too esto paezme una «frivolité», y lo que yo taba esperando yera a ver qué dicía’l nuevu y prometedor Papa, qu’aportó al cargu con espeutatives de fondos cambeos, al rodiu de la relixón nel nuestru país. Si diba a sofitar a esos cristianos de base que agora tán dafechamente marxinaos, si diba a «cortar les esnales» a esi Rouco y a esi otru Camino que nun aparen d’esbarriar, si diba a prometer una ilesia de y pa los probes, y si el drechu a la vida inclui nun sólo a los «nasciturus», sinón tamién a los que tan más espoxigaos. Pero d’eso ren de ren. Al «resve». El Rouco y el Camino anden como los pantanos: «crecíos», y agora piden que se revise la llei del divorciu, del matrimoniu homosexual, del albuertu y que se llante la obligatoriedá de dir a misa los domingos y fiestes de guardar. Entós ¿tanta fumareda blanca y tantu Papa «progre» pa desandar el camín? Pa eso tábemos meyor con Ratzinger, polo menos sabíemos a que nos atener.
