Esti día lleo nel periódicu’l fallecimientu de don Luis Argüelles. Un nidiu sentimientu de perda m’enllena porque don Luis, al que traté nos díes llonxanos de Conceyu Bable-Xixón yera una bona persona y un gran intelectual asturianu y asturianista. Amó a esa Asturies que bien mal se portó con elli, polo menos a nivel oficial. Como pequeñu homenaxe personal, yá que nun puedo asistir al so funeral por tar fuera d’Asturies, reproduzo embaxo un comentariu escritu nesti mesmu blogue, por mor d’un actu que se-y fizo na Residencia onde taba asitiáu fai agora dos años. Y mándo-y un fuerte abrazu en nome de los que d’aquella (1975) yéremos unos mozos que compartimos con elli mesa de trabayu y de tertulies, al mandu de Xuan Xosé: Urbano, Ana, Dubardu, Agustín, Loli, Amalia, Monchu, Tere, Elena, Eva, Helios, Aquilino… y otros qu’agora nun recuerdo. ¡Que la tierra-y sea leve!
LUIS ARGÜELLES: UN MERECÍU HOMENAXE
Esti martes 25 cellebróse nel Centru Xerontolóxicu Xovellanos, nel Coto en Xixón, un merecíu homenaxe a don Luis Argüelles, el que fue primer direutor del Muséu del Pueblu d’Asturies. L’homenaxe taba organizáu pola Asociación L’Arribada y nel tomaron parte, amás de Berto Álvarez Peña, presidente de l’ Asociación, Xuan Xosé Sánchez Vicente y el conceyal de Cultura Carlos Rubiera. Los tres falaron y afalagaron a don Luis, recordando los sos munchos merecimientos en pro de la Cultura Asturiana. Un llabor silenciosu de recopilación, conservación y espardimientu que nunca nun tuvo’l reconocimientu de les autoridaes públiques, polo menos non na midida que fuere menester. Más bien a la escontra, pagáron-ylo echándolu del cargu de direutor del Muséu, con mui males maneres, esos mesmos qu’agora rásguense les vestidures polos ceses que faen otros grupos políticos.
Tuvi la suerte de conocer a don Luis Argüelles nes primeres reuniones del grupu Conceyu Bable-Xixón, allá pol añu 1975, puesto qu’él acudía a elles pese a que yera muncho mayor que toos nosotros. Siempre aportando’l so puntu de vista interesante. Llueu dexó de dir, seguro porque yera un paisano mui ocupáu, y nosotros yéremos una xente un poco demasiao “revolucionaria”. Pero siempre siguí los sos pasos, lleí los sos interesantísimos artículos etnolóxicos (yera un espertu, por exemplu, nel tema del Antroxu) y pidí pa él, publicamente, el cargu de “Cronista Oficial de Xixón” por ser la persona que más lo merecería. Eso, como munches otres coses, quedó “pa prau”.
Llamenté muncho nun poder asistir al actu (fízose a una hora imposible pa min), pero quiero dende esti modestu blogue sumame al merecidísimu homenaxe que se-y dedicó, y aprovechar pa da-y les gracies por tol importantísimu llabor que fizo pa nós, y pa les xeneraciones futures d’asturianos. Habrá qu’esplica-yos a los responsables de cultura de los partíos políticos quién ye esti señor.
