Cellebróse esti miércoles día 22, nel Teatru Xovellanos, la llamada Gala Lírica entamada pola Filarmónica de Xixón. Y como pongo nel títulu, resultó un conciertu mui asturianu yá que los cuatro actuantes yeren de la nuestra tierra. En primer llugar la yá famosa soprano Beatriz Díaz, que ye de Boo (Ayer) y que vimos va pocu tiempu en «Cantarinos pa que suañes», yá reseñada. En segundu, la mezzosoprano Serena Pérez, que ye xixonesa. Depués el tenor Juan Noval-Moro, de La Pola Siero y pa finar el pianista y encargáu de llevar la música en toles actuaciones, Marcos Suárez que ye llangreanu. Too, pues, quedaba en casa y la verdá ye que la so casa, o seya, Asturies, quedó dafechamente bien representada.
La Gala tuvo dos partes. Una primera rellacionada cola opera y la segunda dedicada al xéneru más llixeru como ye la zarzuela. Les dos tuvieron mui bien anque me paez que la xente esfrutó más de la segunda, quiciás porque la música-yos resultó más conocida y más allegre. Na primera destacó, al mio xuiciu, la interpretación de Beatriz Díaz nel aria de Mozart de la opera «Idomeneo». Una opera mui poco interpretada y que tien abonda dificultá. Sorprendióme muncho la mezzo Serena Pérez, a la que nun conocía, y qu’interpretó perbién toles sos pieces, tanto l’habanera de Carmen, de Bizet, como l’aria de «L’italiana in Algeri». Tien una voz superagradable y muncha presencia n’escena. El dúu que fizo con Beatriz en la barcarola de «Los cuentos de Hoffman» fue deliciosu. En cuantes al tenor polesu, destacar la so gran voz, como un torrente, sobre too nes notes altes, anque al mio modestu talantar faltó-y un poco de matización en dellos momentos, como nel aria que cantó de Carmen, quiciás pola dificultá del propiu idioma. En cambiu caltuvo mui bien el tipu nel dúu, cola soprano, na famosa «O soave fanciulla» de «La Boheme».
Na segunda parte los tres tuvieron a bon altor, aprovechando les sos voces al másimu nunes pieces zarzueleres guapes y simpátiques. A destacar el dúu de «Luisa Fernanda» ente Beatriz y Juan Noval-Moro, que resultó guapísimu, la siempre difícil «Por el humo se sabe», de «Doña Francisquita», onde’l tenor sacóla alantre con entrega y bona voz, y la «Chulapona» que Serena fizo con muncha soltura y sentíu del humor.
Capítulu aparte pal pianista llangreanu Marcos Suárez, con un trabayu abondosu pues llevó tola parte musical del actu y facilitó dafechu’l llabor de los cantantes. Tuvo a un nivel mui altu. Por mor de los munchos aplausos, el trio d’actuantes ufiertó hasta cuatro «propines», ente elles la guapísima habanera «Todas las mañanitas», y l’aria de «La tabernera del puerto», «No puede ser». Por cierto el tenor principió nun tonu demasiáu altu, paró la música y dixo ente los aplausos del públicu: «Eso: no puede ser». Finó l’actu con un preciosu Villancicu qu’entonaron xuntamente toos ellos pidiendo la collaboración del públicu, que nun llegó por timidez y poles mazcarines que nos afogaben nel patiu butaques. En resume, un prestosísimu conciertu enllenu de calidá… y d’asturianía. Hai equí más cantera que en Mareo.
