Salgo del estrenu de la ópera «La Regenta», de Marisa Manchado y Amelia Valcarcel, con un mal tastu na boca. Cola impresión de qu’aquello qu’acabo ver nun ye lo que Clarín escribió. Ta claro que, una adautación, nesti casu pa ser musicada y cantada, nun pue ser talo que l’orixinal. Y dígolo yo qu’acabo facer una adautación pa chavales d’esa mesma obra y costóme sangre, sudu y llárimes. Imaxino lo que ye’l facelo pa un trabayu d’eses dimensiones. Una cosa asina necesita munchos cambeos pa poder llograr un resultáu afayadizu. Pero nun ye eso lo que yo echo en falta. Y ye que, dame la impresion que lo que se quixo facer fue una especie d’ópera de tesis. Una tesis que sería que, en definitiva, toles muyeres son «Rexentes», porque resulten engañaes, burllaes, acosaes, despreciaes y tolos demás «aes» que seamos a poner. Y non sólo agora, sinón a lo llargo’l tiempu. Pa ello utilicen, pa los figurantes (miembros del coru), traxes de distintes dómines: hailos del sieglu XVII, XVIII y modernes, hasta un personaxe que va con traxe de cueru (Obdulia).
Bien, hasta ehí nada qu’oxetar. Caún o cada una, pue facer tesis de lo que quiera siempre que nun falte al respetu al autor orixinal, porque si non lo que tien que facer ye una obra nueva onde esplaye la so teoria sobre’ tema, y non aprovechar la obra d’otru camudándo-y la intención. Y ye qu’equí, nel resultáu final de la ópera, lo más importante nun fue’l llibretu d’Amelia Valcarcel, que s’axustó bastante a la idea clariniana, sinón el montaxe, lo que se llama la Direición d’escena. Partiendo d’una idea aprovechable, na que se presentaba a Ana Ozores como enzarrada nuna gran xaula y observada nun planu superior pola sociedá vetustense, llueu, por querer cargar les tintes, enllenóla de vulgaridá. Una vulgaridá que nun hai na novela de Clarín. El resultáu, que lo que vimos nel Campoamor fue una obra desagradable, non solo turbia, sinón sórdida y la obra de Leopoldo Alas ye un drama, pero pa nada ye una novela sórdida. Pasóme igual cuando ficieron un montaxe del «Don Giovanni», de Mozart, que cuasi lleguen a tapecer la maraviosa música del autor de Salzsburgo con escenes de sangre y violaciones que nun veníen a cuentu. El problema añadíu ye que, amás, nesta Regenta, la música tampoco nun acompaña. Una música recitativa, monótona, ensin melodía cantable dalguna, al puntu que nun podría dicir si los cantantes son bonos o malos, porque en nengún momentu pudieron esplayase, romper a cantar, aventar la voz. El resultáu fue qu’hubo xente que marchó enantes d’acabar y que, al final, anque hubo los aplausos de rigor de los que van con invitación, tamién hubo delles protestes. La verdá, y cuéstame tener que dicilo, paecióme una ópera fallida. Pero, como siempre digo, yo nun soi un espertu nesta estaya (igual en nenguna), namás un aficionáu al que-y presta la lírica. O seya, que ye una opinión. Llibre, eso sí.
