Pingarata 1. Nunca nun vi na prensa asturiana un menor interés y cubrimientu de la noticia qu’esti añu. El propiu Día de les Lletres nin La Nueva España nin El Comercio punxeron nada del eventu. Nada. Recuerdo, va pocu tiempu, cuando poníen un Suplementu Especial con poemes, cuentos, artículos, etc. El día depués, LNE punxo una fueya y EC un cachu d’otra.
Pingarata 2. La televisión autonómica sí retransmitió l’actu en direuto. Tuvo mui bien, anque pola hora que fixaron condicionó tolo demás, inclusive’l cambiu de día na Manifestación de la Xunta Pola Defensa de la Llingua que ye fácil que restare xente.
Pingarata 3. Asistieron destacaos políticos. Tuvo bien. Pero hai que recordar que, por exemplu, en Galicia, el Día das Letras Galegas ye festivu. A los nuestros políticos hai que-yos pidir muncho más.
Pingarata 4. Nel Teatru Campoamor dellos amigos entrugáronme por qué nun ocupé, como n’años anteriores, asientu ente los Miembros de Númberu de l’Academia. La razón ye que va unos meses dexé de ser Miembru de Númberu pa pasar a ser Miembru d’Honor. Depués de 38 años de participar nes Xuntes Académiques y votar importantes resoluciones camiento que’l mio ciclu nesa estaya ta más que cumplíu, amás d’otres razones de tipu personal. Asina qu’acoyíme a un artìculu de los Estatutos de l’Academia pol que, los mayores de 70 años, podemos pidir la baxa como «numerariu» pa pasar a esi duce retiru que ye ser Miembru d’Honor. De xuro que’l mio puestu va a cubrise por xente más importante que yo.
Pingarata 5. Y alón.
