Títulu: «Algo alrededor de tu cuello»
Autora: Chimamanda Ngozi Adichie
Torna: Aurora Echevarría
Editorial: Mondadori
Añu: 2009
NUNA BONA LLINIA.- Va pocu tiempu, reseñé nesti blogue la novela d’esta mesma autora «Medio sol amarillo«, y ponía-y mui bona nota. La guerra de Biafra y la historia de dalgunes de les families de los vencíos, formaben un universu mui ricu y mui bien cuntáu pola escritora nixeriana (Enugu, 1977) polo que quedé con ganes de lleer más coses d’ella. «Algo alrededor de tu cuello» ye un conxuntu de 12 rellatos que, anque mui estremaos ente sí, caltienen una coherencia y una unidá de conxuntu. Nellos recuéyense les esperiencies de personaxes del país de l’autora, mayormente muyeres, y los sos suaños d’emigración a Estaos Xuníos. Unos suaños que bien ceo se ven fendíos, rotos, porque la esperiencia norteamericana nun ye nunca mui positiva. Aquello nun ye lo que se suañaba y asina, los protagonistes de Chimamanda Ngozi deambulen ente Nueva York y Lagos ensin tener una patria definida. Dalgo a lo que poder garrase con seguridá. Tolos cuentos tienen un altor grande, pero hai media docena d’ellos dafechamte guapos. Por citar dalgún diría «La celda uno», un pequeñu drama carcelariu; «La embajada de los Estados Unidos«, onde se recueye esa esperanza en poder colar pa un mundu meyor, lloñe de la dictadura que gobierna Nixeria; «Jumping Monkey Hill«, un congresu d’escritores africanos onde, amás de les rellaciones interpersonales, xuégase a eso tan prestos de «la lliteratura dientro la lliteratura», ufiertándonos dalgún de los cuentos que s’escriben naquella xunta; o «El lunes de la semana anterior«, con una curiosa rellación ente dos muyeres mui distintes pero, que de dalguna manera, atráense.
El resume de la llectura del llibru ye mui positiva, pues la escritora nixeriana sabe texer histories interesantes y sabe cómo cuntales, con una prosa cenciella pero siempre intensa que ye quién a conmovenos y a tresmitinos los sentimientos d’unos personaxes solitarios y desubicaos. Una mui bona eleición.
