A última hora nun pudi dir ayer a la presentación en Xixón de la revista «Campo de los Patos» que dirixe/edita Antón García. Y bien que lo sintí porque siempres ye gocioso axudar a dar a lluz a un productu cultural asturianu de calidá. Nun andamos sobraos d’ello. Amás tamién tengo una pequeña collaboración na revista (una gota d’agua nun océanu lliterariu), razones sobraes pa tar ellí. En fin…
En cualquier casu lo importante ye que la revista salió (delles veces falamos Antón y yo de los problemes financieros qu’había), que se presentó a la xente y, sobre too que, al mio xuiciu, cumple les espeutatives que n’ella teníemos. Trátase de cuasi un monográficu al rodiu de la Poesía Norteamericana, que nun ye sinón la primer parte d’un trabayu más ampliu que va tener continuidá nun prósimu númberu. Namás poles firmes qu’Antón incorpora a la revista, pescanciamos la importancia del trabayu. Nun voi citales agora pero abasta con echar una güeyada al Indiz pa dase cuenta de que con collaboradores asina nun hai mieu al fracasu. Queda tamién un requexín empobináu a la lliteratura nuestra, anque como sabemos, la lliteratura, la bona lliteratura, ye patrimoniu de toos, o seya que tamién ye nuestra. Entós meyor tendría de dicir pa la lliteratura asturiana. Y zarrando esti númberu 3 de «Campo de los Patos», una estaya de comentariu y crítica de llibros más o menos recientes.
La verdá ye que yo nun soi un gran llector de poesía, lo cuál digo con una cierta vergoña, y muncho menos de poesía norteamericana. Debí quedar allancáu en Whitman, nuna vieya edición de Losada con introducción y torna de León Felipe. Entovía tengo perehí el llibru coles páxines amarielleantes. Pero eso nun quita (nun va a quitar) pa que faiga un repás de los poetes recoyíos na revista d’Antón. Seguro que munchos d’ellos van a prestame.
Y namás que dar la norabona al director/editor por siguir ufiertándonos bonos productos, y desea-y a «Campo de los Patos» una llarga vida y un gran espardimientu. Pol bien de la lliteratura asturiana y pol nuestru propiu y egoista placer.
(Semeya de LNE)
