Tolos esforciaos llectores d’esti blogue saben, porque siempre lo dixi, la manía que-y tengo a esa táctica futbolística denomada pola prensa deportiva «el Tiki-Taca». Un sistema de xuegu qu’aburre a les piedres -inclusive a los que ganen, como dixo’l presidente del Bayern- y qu’a lo llargo de munchos años se dixo que yera la panacea de la Seleición Española. Una Seleición que cuntaba con una plantiya de futbolistes únicos, una xeneración irrepetible, que xugaríen y ganaríen lo mesmo con esa táctica que con cualquiera otra. En tou casu, el sistema creáu por don Luis Aragonés partía de dalgo que se perdió ya va tiempu: una defensa fuerte, un acosu al contrariu a lo llargo de tol campu p’arrempuña-y el balón, y llueu la calidá personal d’un piñu de centrocampistes que mareaben al contrariu, sí, pero que yeren capaces de meter balones verticales a los delanteros pa crear ocasiones y marcar goles. D’ehí la porrada d’ellos que se metíen y que ficieron, por exemplu, a Villa másimu goliador de tolos tiempos. Nada d’eso queda. Lo que fai agora la «Roja» ye una parodia de fútbol, ensin velocidá, ensin tensión, ensín acosu al contrariu, con una horizontalidá desesperante. Nel partíu d’ayeri ante una veterana Holanda fue tou un despropósitu. Una sensación d’impotencia ante un equipu que salíu precavíu, pero nel intre caltrió que nun tenía a naide delantre. En cuantes apertaron un poco l’acelerador diéronnos una «mexada». Perdimos tolos choques, toles carreres, toles disputes. Dende un desconocíu Casillas, al que se-y noten demasiao los años o el non xugar davezu, hasta l’últimu xugador fueron una calamidá, y dende llueu hai
xugadores que yá cumplieron el so ciclu vital pa xugar al nivel más altu.
El responsable másimu de tou esi desastre ye, claro, el Marqués de Del Bosque, un «buenista» que nun supo dar un güelpe de timón a la nave y principiar a preparar el relevu del sistema y de la xente. Y que nun se me diga agora que digo esto depués del resultáu d’ayeri. Eso diránlo otros. Yo va tiempu que dixi, dende equí mesmu, que’l Tiki-Taca taba dafechamente acabáu. Díxelo cuando España ganaba, y esti añu cuando perdió’l Barsa la Copa frente al Madrid y el Bayern la Lliga Campeones. Y dígolo agora más alto: «A la mierda’l Tiki-Taca», y si quieren pasar a otra fase, cosa que yá nun depende de nosotros, hai que xugar a otra cosa.
