L’últimu asaltu a les instalaciones del Unión Club Ciares, un equipu modestu pero distintu a la hora atalantar el mundu del fútbol, supón un reblagu mui peligrosu na violencia que, dende va tiempu, vienen emplegando, con absoluta impunidá, eses bandes de mozos (y nun tan mozos) que s’abelluguen embaxo l’alcuñu de «Ultra Boys». Y digo l’últimu, porque yá hubo otros intentos d’asaltu, dalgunos d’ellos consumaos, nes dependencies d’esti club al que yo-y tengo un cariñu especial.
Un cariñu frutu del mio pasu per él, allá nos llonxanos años de xuventú, onde viví grandes emociones como la de poder xugar nel campu d’El Molinón y marcar ellí dos goles. Dalgo colo que, como tengo dicho munches veces, suaño entovía. Amás, esti mesmu añu fui invitáu a participar como xuráu, nel primer concursu de cuentos de fútbol entamáu pol Club, como amuesa de que, ellos sí, son daqué más qu’un club de fútbol. Pero tou esti apreciu, creo que compartíu, nun tien que ver col fechu nidiu y rotundu de que nun pue consentise qu’una banda organizada, y de la que se conocen munchos de los sos miembros, ataque violentamente a los direutivos, xugadores o aficionaos d’un equipu de fútbol. Nin d’un equipu de fútbol, nin de nenguna otra cosa. Porque l’emplegu de dichos actos ta demás nuna sociedá que se pretende civilizada.
Y ye que ya fiede la impunidá con qu’estos grupos desendolquen la so actividá a plena lluz del día. El Sporting sabe quiénes son y, nun sólo nun-yos planta cara, sinón que los abelluga concediéndo-yos privilexos y tratándolos con procuru porque, dicen, son los que más animen al equipu. Nun sé si les Xuventudes Hitlerianes, o les propies S.S. animaben al Hertha de Berlín o al Borussia de Dortmund, pero anque así fuere, ello nun los redime del so nefastu pasu pela Historia. Y siendo esto malo, lo peor ye que tamién la policía y los xueces saben quiénes son y lo que fain, y nun paez que seyan capaces de poner fin a una violencia repetida que, esperemos que non, pue pasar de ser una dolorosa anéudota, pa convertise nuna traxedia.
