Formó parte d’eso que, de mou un poco cursi, llámase «la memoria sentimental de la vida». Nesti casu de la mía. Nun ye que fuere de les más favorites, pero sí abondo pa dedicá-y un sele recuerdu nesti blogue pol que pasaron otres necrolóxiques. Nun voi recordar detalles de la so vida, pa eso ta la wiquipedia y los periódicos, anque creo que la marcó bastante’l so matrimoniu con Fernando Fernán Gómez, gran actor, direutor y escritor pero persona con un carauter inaguantable. La verdá, nun me peguen nada l’un pa la otra, pero esa ye otra historia.
María Dolores Pradera, de la que siempres se pondera la elegancia y el bon porte, fue una notable actriz de cine y de teatru, anque quiciás más popular pola so carrera como cantante. Más que cantar, podría dicise que falaba o recitaba les canciones porque nun tenía una gran voz. Sí un gran gustu y un perfeutu fraséu. Formando grupu con Los Gemelos, escelentes guitarristes, pasiaron per tol mundu una piñu de precioses canciones, boleros, rancheres, cancios populares… Y faciendo tamién honor a l’asturianidá de sos güelos, que yeren de Tinéu, cantó con gustu dalguna canción asturiana, como la famosa de «Les barandielles del puente…», la famosa añada de la muyer adúltera, estudiada ente otros por Federico García Lorca, y unes vaqueirines cantaes con munchu estil. Pol so aspeutu siempres me paeció una señora mayor, pero nun fue hasta agora en que, dicen que con 93 años, falleció na so casa de Madrid. Descanse en paz. Como recuerdu, pongo eses vaqueirines de la tierra los sos ancestros, colgaes en youtube.
Semeya: Carlos Baraja
