Pasaron les eleiciones como’l «rayu que nun cesa». Too quedó pates p’arriba. El llamáu «efeutu Cascos» produxo los resultaos que se preveíen: el PP quedó desmanteláu y el PSOE enseñando «les vergüences». Queda, entovía, por ver cómo van recomponese les mayoríes y les minoríes, pero paez nidio que l’antiguu vicepresidente del señor Aznar va mandar per cuatro años na nuestra comunidá. ¿Y qué va a suponer eso? Habrá que da-yos esos cien primeros díes de tregua pa sabelo. Yo nun quiero a les dereches nin pa comer una fabada, pero tamién ye verdá que facía falta «barrer» un poco la casa, depués de tantos años de gobiernu de la FSA, de la UXT, de los amigos de los amigos, y del votu cautivu de pensionistes, xubilaos, funcionarios de confianza, secretarios, vicesecretarios y demás xente que llevaben tantu tiempu ehí asitiaos que talamente creyíen que la casa yera d’ellos. ¿Los que vengan van ser peores? Bono, veremos. Y si ye asina, dirémoslo como siempre ficimos.
Y ¿qué dicir de «los nuestros»? ¿De nacionalistes y asturianistes? Agora lo fácil ye dicir: «Víase venir». O «yá lo dixi yo». Agora lo fácil ye dicir: «Val más marchar pa casa». Agora lo fácil ye echar les culpes a toos. Agora lo fácil ye desmovilizase, dir al chigre a criticar, mandar mensaxes a los «chats» d’internet. Agora lo fácil ye esperar otros cuatro años y, quince díes enantes de les próximes votaciones, principiar a falar de qu’hai que se xuntar y de qu’hai que facer coses. Eso ye lo fácil, nestos momentos de marea baxa y desmoralización. Pero ¿quién dixo qu’esto diba a ser fácil? ¿Quién cree qu’un país se llevanta trabayando cada cuatro años pa presentase a unes eleiciones? El que lo piense, nun tien idea de lo que cuesta.
¿Adeprenderemos la lleción? Vamos repitilo una vuelta más anque suene a perconocío: Si queremos tener representación parallamentaria (paez que nesto tamos toos d’alcuerdu, la época de les catacumbes yá pasó), tenemos que conseguir axuntar a tolos grupos nacionaliste/asturianistes, y entemecer tamién a independientes interesaos en trabayar politicamente por Asturies. Y ello habrá que lo facer con tiempu y trabayu. El Bloque por Asturies-UNA sacó más de seis mil votos nestes eleiciones. Nun ye muncho. Pero seis mil paisanos y muyeres implicaos nun trabayu pal qu’ hai cuatro años de plazu, tampoco ye tan poco. Ye una bona base pa entamar. Lo del PAS-URAS víase venir (nun tanto, ye verdá), sobre too pola práutica desapaición de la URAS y la perda de sofitos del PAS, munchos de los cuales paez que s’apuntaron al «carru vencedor». Nun soi naide pa dar conseyos, pero tendrán que facer una fonda reflexón.
Voi finando. Agora lo fácil ye echase les culpes unos a otros. Agora lo fácil ye dicir qu’Asturies nun tien igua y qu’allá los asturianos y lo qu’escueyen. Pero, repito, naide dixo qu’esto diba a ser fácil. Asina que, ¡ánimu! y a nun se desmoralizar. Cuatro años pasen bien ceo pero, al empar, ye tiempu suficiente pa dir preparando dalgo más «consistente» pa les prósimes eleiciones. Pues eso, naide dixo qu’esto diba a ser fácil.
