Ye ésta una parte de la mio historia que queda mui lloñe. Corría l’añu universitariu 1965-66 y taba estudiando Económiques en Bilbao, porque n’Uviéu nun la hubo hasta tiempu depués. L’añu anterior fuéremos p’allá un piñu de compañeros de la Escuela Comerciu porque, col títulu de Profesor Mercantil, convalidábennos delles asignatures d’Económiques. El primer añu anduvimos cambiando de pensión, pues toes yeren bastante males, asina que decidimos pal siguiente, cosa que d’aquella nun yera mui corriente, alquilar un pisu y vivir al nuestru aire. Y nesi pisu, nun sé mui bien pente medies de quién, entró Luis Martínez Noval, que venía de los Xesuítes y matriculóse en primero d’Inxeniería, anque llueu finó faciendo Económiques. Asina que convivimos, cuartu con cuartu, a lo llargo d’un añu escolar enteru. El compartía habitación con Toño Zárraga, yo facíalo con José Agüera (un de los más importantes economistes asturianos) y na tercera taben Jesús Ferrero (qu’anda per El Salvador trabayando colos neños probes, que son cuasi toos) y el xenial Alberto Cardín, muertu mui mozu y que fue un de los más destacaos intelectuales d’Asturies. La so importantísima biblioteca afáyase agora nel Campus d’Humanidaes de la Universidá d’Uviéu. El sétimu componente del llamáu, pelos compañeros vascos, «el pisu de los Asturianos», yera Jesús Carrascosa, que fue xesuíta pero tiempu depués salióse de la orde.
Noval yera un bon rapaz que taba principiando a abrise a la vida. Intelixente y con sentíu del humor. Esi añu que convivimos xuntos llevámonos mui bien, anque como Agüera y yo yéremos un poco más mayores, él quiciás diba un poco supeditáu a nosotros. L’añu siguiente desfízose’l grupu y dalgunos colamos pa otru pisu na cai Mazarredo. Él quedó ellí. Llueu marché de Bilbao y perdí-y la pista. Dalgunos d’aquellos collacios d’Universidá metímonos en grupos antifranquistes y militamos na clandestinidá con mayor o menor importancia. Noval nun fue un d’ellos, polo menos que yo supiere. Ensin embargu, yá na época democrática vi’l so nome arreyáu al PSOE, partíu nel que fue ascendiendo hasta asitiase nos puestos más importantes. Pero esa yá ye una parte de la historia que, por sabida, nun m’interesa tocar.
Con Noval nun volví a falar, y del so llabor políticu namás quiero dicir que tuvi en desalcuerdu cola mayoría de les decisiones que, respeutu a Asturies, tomó aquella clas política de la qu’él yera miembru. En cualquier casu, polo que dicen los sos compañeros de partíu y la xente que lu trató, fue siempre una bona persona. Allégrome, porque asina me ye más fácil caltener aquel recuerdu que tenía de cuando compartimos pisu na cai Gordóniz de Bilbao. Esti día llamóme José Agüera por si quería dir al so funeral. Díxe-y que non, lo que nun se fizo en vida nun tien sentíu na muerte. Que la tierra-y seya leve.
(Na semeya, de pie, d’izquierda a mandrecha: Luis Martínez Noval, Toño Zárraga, Alberto Cardín (con alzacuellu), Quico Fidalgo (de cura, güei capellán de Cabueñes), Cantero, un tal García Oliva y Paco Marín. Agachaos, Luis Hevia y Jesús Carrascosa.)
