Yeren dos hermanos y los dos xugaron col Sporting. El mayor, Ansuriza I, yera extremu izquierda, zurdu zarráu, hábil col balón y con bon regate, pero mui poco combativu. O seya, más bien «cagalón». Facíen-y una entrada dura y yá nun volvíes a velu pol campu. L’hermanu pequeñu -Ansuriza II- yera tolo contrario. Fuerte, valiente, rápidu y pegábase con tolos defenses si facía falta. Lo único malo ye que… duró muy poco nel mundu del fútbol.
Destacó sobremanera nel Sporting xuvenil de primeros de los años sesenta, cuando l’equipu xugaba que lo bordaba y tenía una delantera temible: Lastra, Ansuriza II, David, Pocholo y Valiño. Los dos extremos yeren compañeros míos del Corazón de María, anque yo yera más mocín. Lastra, rápidu y fuerte. Valiño con un gran toque de balón. David llegare del Universidá Llaboral, oportunista y llistu nel aria. Metía munchos goles. Pocholo, un grandísimu xugador con un regate endiabláu. Xugó munchos años llueu col equipu grande y finó creo que nel Celta de Vigo. Y Ansuriza II, qu’arrancaba dende atrás cola so potente zancada, regateaba sobre la marcha y remataba con potencia, tanto colos pies como cola tiesta. Tantu espectáculu daben que pasaron de xugar nel Campu los Fresno, al mesmu Campu del Molinón, porque la xente acudía en masa. Recuerdo una eliminatoria escontra l’Atlhetic de Bilbao que fue una maravía, anque quedáremos eliminaos.
L’últimu añu de xuvenil, Ansuriza II principió a tener problemes cola vista y, daquella, nun había lentiyes, nin eses coses que se ponen agora pola cara, lo cuál yá yera un problema. Aún asina, con 19 años, llegó a debutar col primer equipu del Sporting cola mala suerte de que, creo que nel mesmu primer partíu, rompiéron-y una pierna y yá nun xugó más col Sporting. Tampoco la melecina taba al altor d’agora. Creo que llueu pasó entovía por equipos rexonales, pero nunca fue’l mésmu. Esti día lleo la noticia de la so muerte y recuerdo, con una cierta señaldá, a aquel rapazón que lo tenía too pa trunfar nel fútbol. Pero, pese a les sos condiciones, la vida nun-y dio esa oportunidá. Descanse en paz Ansuriza II.
