Averíes sospechoses

Yo creo que ye la CIA, pero podría tratase mui guapamente de la KGB, El Mossad o el MI5. El casu ye que llevo un tiempu nel que dalguién ta saboteándome’l blogue y dándome más guerra qu’aquella del Golfo. O de los golfos, porque hubo más d’un. Y como les desplicaciones de “servidores”, “plantiyes” y otres monsergues pol estil nun les entiendo, nin a los mios años espero entendeles nunca, ye polo que recurro a los Servicios Secretos internacionales qu’ehí yá sé con quién trato. Total, que depués d’unos díes ensin enllenar de babayaes l’espaciu interneteru (si ye que ye un espaciu y non una nebulosa espacial), torno de nuevo a poner delles ocurrencies pa entretenimiento de los ociosos y roxura de los críticos, que de too hai nel llagar del Señor. Bienveníos, otra vuelta, a esti blogue (a ver lo que dura)