close
Ayer falamos con Venezuela…

Ayer falamos con Venezuela…

2013-03-06Muerte Hugo Chavez439Visitas

hugo_chavez_Ayer falamos con Venezuela. Facémoslo con dalguna regularidá pues tenemos ellí familia: un primu carnal de la muyer (les madres hermanes), que marchó de Xixón con sos pás, va munchos años, y que en San Cristobal s’afincó, casó y tuvo fíos y nietos. La so muyer ye una guapa (entovía güei de mayor) venezolana, con un padre ricu, anque veníu a menos. Ellos tienen ellí negocios, anque la cosa nun ye lo que yera.

Cuento too esto porque abúltame que la so opinión sobre Chaves y el «chavismu», ye una opinión autorizada. Y nesti tema, creo qu’hai mui poques opiniones autorizaes. Cuasi tolo que nos llega ye pente medies d’informaciones interesaes, de cadenes periodístiques que nun dicen una verdá anque los maten (la mayoría estadounidenses) y que presenten al agora yá estintu Presidente de Venezuela, como un ogru, con un aquello fascista (o polo menos antidemócrata) y que fizo del so país un campu de xuegu personal. La opinión de los nuestros primos, familia media como digo, ye que Chaves fizo munchísimo pol so pueblu. Un pueblu que tuviere siempre marxináu y na ignorancia, polos intereses d’unes oligarquíes que, elles sí, ficieron y desficieron al so antoxu en beneficiu propiu. Chaves, col petroleu nacionalizáu, y aprovechando una coyuntura favoratible, emplegó los beneficios pa volcase en favor de les clases populares, los más probes, que yeren munchos millones. Promovió la educación, estendió la sanidá y elevó’l nivel de vida nos últimos 10 años, nunos índices que la propia ONU reconoz. Poro, el pueblu ta con él. En tou esti tiempu, dicía la nuestra prima, fuimos a les urnes «tropecientes» veces, a votar tou tipu de coses. Y siempre ganó, esceuto l’últimu cambiu de la constitución.  

Tengo dicho n’otru comentariu d’esti blogue, qu’ Hugo Chavez yera’l tipu de persona que peor me cayía: Charrán,Misiones sociales bocayón, populista… Pero tamién dixi, nesi mesmu comentariu, que la mayoría del pueblu taba con él por eso que los nuestros primos comenten. En fin, qu’una cosa son les formes y otra’l fondu, y que a un ciudadanu occidental cuésta-y muncho ver con normalidá coses que pa la xente d’aquellos paises lo ye. Valoremos, entós, les coses bones que Chavez fizo pol so pueblu, anque tamién metiere la pata abondes veces. Lo que ta claro ye que, como se diz nestos casos, habrá un enantes y un depués de don Hugo. Naide podrá sustituyilu y pal futuru d’esi gran país, Venezuela, habrá que falar, ponese d’alcuerdu y crear unes instituciones que funcionen y que sustituyan a les grandes persones. D’estes, cuantes menos haya, meyor. Total que, ayer falamos con Venezuela ensin saber que, unes poques hores depués, esti curiosu personaxe diba a facer el «tránsitu». ¿Hacía ónde? Eso sí que nun lo sabemos. De momentu, hacia la Historia.