Nun sé si les Güelgues Xenerales (ésta en concreto) sirven pa dalgo. Igual non. Pero había que la facer. Cualquier cosa menos enzarrase en casa, o lo que ye peor, dientro d’un mesmu, a llamentase de cómo tán desguazándonos el país un piñu de sirvengüences y nun mover un solu deu pa evitalo. Que sepan (yá lo saben) que la xente que salimos a la cai nun tamos d’alcuerdu col desmantelamientu d’una sociedá que, hasta va pocu tiempu, principiaba a tar prósima a eso que se llamaba «sociedá del bienestar». Colos nuestros probes y les nuestres miseries, pero con una sanidá, una educación, una xusticia, una atención a los mayores, a les muyeres maltrataes, etc. al algame de cualquiera, ensin tener que pagar demasiao por ello. Eso acabóse. O ta, como dalgunes especies animales: en víes d’estinción. Y pa encima nun quieren que nos quexemos, qu’espatuxemos, que ye lo único que nos queda. Lo cuálo ye yá’l colmu de la cara dura.
Poro, anque a lo meyor nun valiere pa nada, animéme a dir a la «mani» de los piquiñinos, xuntándome con un grupu abondo
numberosu que nun sabría cuantificar porque, como dicía l’otru: «A min me se dan meyor les lletres». Y demientres caminaba, coldu con coldu, con xente a la que nun conocía de nada (a esceición de Lluis Pascual y Balbi), diba pensando qu’aquello tenía, polo menos, un sentíu d’abellugu, de proteición. Un nun sentite solu y desamparáu frente a esos poderes intanxibles (fondos monetarios internaciones, bancos centrales europeos, axencies que nos califiquen sin que sepamos de qué, como esi Josef K. d’ «El procesu», de Kafka que pasa d’un sitiu a otru ensin que sepa de que lu acusen) Y la metafora que se m’ocurría yera que la «mani» constituyía una especie de «Calor y Café», esi serviciu que se facía a los transeuntes qu’andaben ensin recursos, al debalu, pa que se sintieren un pocoñín abellugaos. Un serviciu, por cierto, que tamién s’esmució cola crisis dexándonos más solos, más al ventestate. Anque sólo fuere por eso, por esi sentimientu de nun tar solu frente a unos poderes superiores que te machaquen, yá paga’l tiru facer una Güelga Xeneral y asistir a una «mani». Pa comprobar que los tos problemes nun son sólo tuyos, sinón de toos. Y a lo meyor, nun sé de qué manera, eso ye un primer pasu pa dalgo. O non, vete tú a saber.
