Cuenten los turistes que pasen a dar una revolada pol cementeriu de Highgate, en Llondres, qu’hai una tumba qu’estos díes se mueve muncho ya, inclusive, que se sienten una especie de rises fuxíes de lo más fondo de la tierra. Depués d’un seriu analís, paez que lleguen a la conclusión de que salen de la tumba de don Carlos Marx, que se «descoyona» de ver cómo gran parte de les tesis qu’él caltuvo, y que produxeron gran «cachondéu» intelectual, tán principiando a facese realidá. Porque’l bonu de don Carlos dixo, ente otres munches coses, que’l propiu sistema capitalista lleva dientro la semiente de la autodestruición, y qu’abastaba con crear les condiciones afayadices pa que s’esbarrumbare con tolos sos analistes, economistes, políticos y otra xente de mal vivir, dientro. Y qu’eso asocedería, non nos paises probes, como yeren Rusia o China, sinón nos paises más desarrollaos, como son los nuestros.Lenin, que nun debió entender mui bien el mensaxe, trato de facelo nel so país, y armó una buena.
A la vista del despiste xeneralizáu de políticos, economistes, etc. etc. que güei dicen una cosa, y mañana otra. Que, pa un mesmu problema, nun sitios apliquen «calmantes», y n’otru «estimulantes». Que torguen el desarrollu y llueu dicen qu’hai que se desarrollar. Y que-yos paez mal que se consulte a la xente sobro qué facer (anque tamién ye verdá que pa gastar les perres nun se ficieron «referendums»). Ante too eso, nun ye d’estrañar que nesi cementeriu de Llondres, en cuantes qu’amiya la nueche y principia’l reinu de les solombres, se sientan eses rises amatagaes provinientes del caxellu de don Carlos. Y ye que, a la vista lo que se ve, tien que tar pasándolo «bomba».
