Los de la mio xeneración tenemos munchos de los socesos históricos asociaos al cine. Eso, claro, ye un peligru grande porque la del cine ye una cultura de mentires. La historia, en manes de los productores norteamericanos, ye inesáuta, cuando non falsificada. Los exemplos seríen tantos qu’enllenaríamos tou esti espaciu. Digo esto porque, a min, el nome de Crimea vienme a la memoria arreyáu a aquella vieya película de Michael Curtiz (¡¡«Casablanca!!) titulada «La carga de la Brigada Ligera», na que trabayaba de mocín el guaperas d’Errol Flynn. Nella, na «peli», unos gloriosos batallones de Dragones, Lanceros y Húsares, ingleses, irlandeses y escoceses, al mandu del xeneral Lord Cardigan, cargaben escontra les cobardes tropes ruses, y los sos cañones, escondíos al final d’un estrenchu valle, con una valentía desaxerada, escribiendo una de les páxines más heroiques de la historia militar británica. Claro que llueu, cuando t’enteres un poco meyor de les coses, sabes que’l tal xeneral Cardigan yera un ineptu, que dio unes órdenes suicides que, a la so vez, fueron peor interpretaes polos sos inferiores y que too ello finó con una sangría que, amás, nun sirvió pa nada. Nun recuerdo si Errol Flyn morría o non, supongo que sí, porque quedaron pocos y él siempres fue un héroe.
Agora en Crimea hai tamién una situación peligrosa, onde los rusos vuelven a xugar el papel de «malos» de la película. Lo que pasa ye que los «bonos» nun tienen el carisma d’Errol Flynn y les sos órdenes nun son tampoco mui clares. Dicía l’otru día, enantes d’estos caberos acontecimientos n’Ucrania, que la cosa llevaba tol camín de la dixebra si nun se llograba, daveres, un gobiernu d’unidá nacional onde tuvieren representaes toles minoríes. Nun ye que nun se llogró, ye que nin siquier s’intentó. Les potencies occidentales, incluyíos los Estaos Xuníos, aplaudieron y reconocieron a les primeres de cambiu al gobiernu provisional, fechu «a la trágala» colos acontecimientos en caliente y la xente na cai. Un gobiernu que pretendía mandar en toa Ucrania, pero que nun tuvo en cuenta pa nada a les grandes minoríes d’orixe, llingua y sentimientu rusos. Crimea ye l’exemplu más notoriu, pero hai otros. ¿Y qué pensaben, que la República Autónoma de Crimea y el propiu Putin diben quedase de brazos cruciaos aceutando una situación que los perxudicaba? Bien, ehí tienen el resultáu: un referendum convocáu pol Parlamentu de Crimea pa separtase d’Ucrania y xuntase a Rusia. Referendum que’l gobiernu de Kiev nun reconoz, y les «potencies occidentales» tampoco.
Lo malo ye qu’esto del Drechu Internacional nun pue ser de plastilina, o seya, que se moldée al gustu de caún y según el momentu y la circunstancia. Cuando lo de Kosovo, esos mesmos qu’agora protesten, aplaudieron hasta coles oreyes la declaración d’independencia del territoriu, a onde fueren a parar unes grandes mayoríes albanes que lu poblaron. D’aquella Rusia nun reconoció la independencia unillateral (España tampoco), y agora les coses son al revés. Y ye que nun pue xuegase con dos baraxes: o respetamos toos les regles, en tou momentu, o esto ye un «sálvese quién puea». Habrá qu’esperar a que los americanos faigan una película sobre ello pa enteranos bien de too, anque imaxinamos quiénes van ser los «malos».
