Dacuando ún entrúgase pa qué val la policía. Nun ye ésta una entruga retórica, nin ganes de facese’l demagogu a estes altures de la vida, ye que, daveres, da la impresión de que la policía, eso que se llama «el serviciu d’orde», ta namás pal usu y abusu d’unos pocos. Sabíemos qu’eso pasaba nes dictadures, pero fatamente creyimos que non, nes supuestes democracies. Agora, con eso del escrache, que yá de mano digo que nun me presta nada, un grupu importante de la policía ta al serviciu de los «escrachaos» (habrá qu’adeprender a utilizar bien la pallabra). Curiosamente esos «escrachaos» pertenecen a la parte la sociedá que, pa entendenos, vamos llamar los «eméritos», los privilexaos: los políticos que tán nel poder, fundamentalmente, pero tamién otres persones de reconocencia social. Nun sé si lo del otru día de la Pantoja fue escrache o simple morbu. Pa eso, repito, hai policía abondo, y nun digamos yá la que van a emplegar cuando faigan esa «estaya d’esclusión» de 300 metros.
Ensin embargu ocurre que’l ciudadanu de a pie, el que nun ye de rellumu social o políticu, cuando tien dalgún problema d’esos d’orde públicu tien que se les arreglar por sí solu. Ensin esa axuda necesaria de los que tán, precisamente pa eso, pa cuidar del orde nes cais y nes ciudaes. Y vien too esto al rodiu d’un casu sangrante que ta asocediendo estos díes en Xixón, nel barriu Cimavilla, y que paez que me da la razón nesto que toi diciendo. El que siga davezu la prensa llocal tuvo de s’enterar de que, tolos fines de selmana, un pequeñu negociu d’espendeduría de bebides y «chuches», asitiáu na cai Vicaría, ye asaltáu y estrozáu pa robar y facer dañu. Esti pequeñu negociu ye propiedá d’una moza llamada Carmen Álvarez, casada, bióloga en paru y madre d’un neñu pequeñu. Cola axuda de so madre, pensionista, invirtió doce mil euros en dos máquines espendedores d’autoventa pa, si nun poder vivir d’ello, polo menos que fuere una axuda nuna situación difícil de crisis. Pero, ¡ai, amiguín! tamos nuna ciudá llibre, y equí nun se pu poner cotu a los rapazos porque, como dixeron dende un partíu políticu d’izquierdes, ye apoderase de la cai que ye un espaciu públicu.
El problema ye que lo que se tien apoderao de la cai ye’l vandalismu, la gochería, la droga, les mexaes, les vomitaes, y el
llatrociniu. Y si dicir esto ye «facha» que m’apunten na llista, porque les cais y les ciudaes son de toos y hai que les respetar. Sobre manera, porque ún, o una probe que quier sobrevivir nesta puñetera crisis, tien que tener drechu a que se-y respete la so forma de sobrevivencia. Y p’asegurar eso, ta la policía, nun pa reprimir a la xente necesitao que se manifiesta, sinón pa reprimir a los vándalos que, ellos sí, apodérense de los espacios públicos y estrocen tolo que tienen a mano. Y si la policía nun ye capaz d’evitar eso qu’asocede una selmana sí y otra tamién, que se desfaiga. Y los impuestos que gastamos en paga-yos a ellos, habrá que los emplegar en pagar a otra xente que lo sepa facer meyor.
Agora sí, de lo que toi seguru ye de que, si na cai Vicaría de Cimavilla viviere, por exemplu, Mª Dolores de Cospedal, el sitiu taría llimpiu, protexíu y con un ensame policíes alredor por si necesitaba una aspirina. Y nun hai drechu a que a otra ciudadana española, por nun ser Mª Dolores de Cospedal, se-y estroce’l so mediu de vida toles selmanes. Porque esa sagrada Constitución que tanto defenden, diz que tolos españoles somos iguales delantre la llei. Y supongo que tamién delantre la policía. ¿O non?
