Acaben de concede-yos el Premiu Príncipe d’Asturies de los Deportes a los hermanos Gasol. Nun seré yo quien niegue los méritos deportivos de dambos a la hora de dá-yoslu. Pero na mio humilde opinión habría que buscar, nestos premios, dalgo más que méritos «de rellumbrón». Los Gasol trunfen n’ Estaos Xuníos y na Seleición Española y cobren por ello una millonada, amás d’esos famosos drechos d’imaxen que suponen otru tanto. Nada que retrucar, les coses son asina nesi mundu de les estrelles. Sólo espero que dexen a la Facienda del so País -España- una parte importante d’eses perres. Cuanto más ricos y famosos, más obligaos deberíen tar de dar exemplu cotizando relixosamente como facemos los demás. Seguro que ye asina.
Pero al marxe de perres y fama, abúltame qu’habría que buscar nestos premios otros merecimientos que, de dalgún mou, exemplaricen a la persona cara al restu la sociedá. Que nun seya sólo que faen bien lo que faen, como ye’l casu, sinón qu’haya, amás, un «plus», dalgo que conmueva (igual la pallabra nun ye la más afayaíza), que sirva como estímulu y meta, pa otros munchos que nunca llegarán a ser «ases» del baloncestu, pero que puen vese motivaos pol exemplu d’ellos.
Un exemplu como’l que nos da la gran Teresa Perales, nadadora paralímpica que ganó a lo llargo de cuatro olimpiaes un carru de medalles pa España. Y, amás d’ello, fue profesora na Universidá de Zaragoza, Diputada en Cortes pol PAR, tien escritos dos llibros y el reconocimientu de tol mundu del deporte y de la sociedá. ¿Nun ye esi un palmarés con «dalgo más» que’l meru espectáculu deportivu? ¿Nun ye un estímulu, nun sólo pa les persones minusválides sinón pa toos nosotros?
Creo daveres que si esto que digo nun ta na filosofía del premiu, polo menos debería tar na de los xuraos que los conceden. P’afalagar a los ganadores yá hai otros munchos premios. El sentíu del Príncipe d’Asturies debiere ser otru.
