Acababa Rajoy de quita-y importancia a lo de la corrupción cuando vieno la realidá, que ye testerona, a desmentilu. Asina, esa cosa «aneudótica» qu’el dicía, paez que nun ye tal, sinón dalgo fondamente enraigonao na propia sociedá española. Y falo de la sociedá española y nun sólo de la clas política o empresarial, como faen dalgunos, porque ta claro que, pese a que los corruptos son persones con nome propiu (y fortuna propia) y pertenecen a ésti o aquél partíu, nun son más que la picalina del famosu iceberg: lo más gordo ta debaxo.
Y ye que yo nun soi a creyer que sean namás toos estos sinvergoñes qu’apaecen nos papeles los que corrompen o son corrompíos. Ellos nun salen de la nada. Son la «vanguardia» d’una sociedá que perdió los valores éticos y que namás tien el dios del dineru fácil a cualquier preciu. Asina, les condenes y les crítiques que se faen cuando un grupu de políticos y empresarios (más de mediu centenar d’una tacada) son atrapaos pola xusticia, paécenme más (y que Dios me lo perdone) por nun poder ser ellos los que lo faigan, que porque censuren el fechu en sí de la falta de moral d’esa xente. Ye llamentable pensar lo que yo pienso, pero l’ampliación del abanicu de delincuentes a cuasi toles estayes sociales fai albidrar que nun toi mui enquivocáu. Yá nun son sólo políticos de derecha y empresarios ensin escrúpulos, son tamién políticos llamaos d’izquierdes, sindicalistes, pequeños empresarios o trabayadores de a pie. Toos siguiendo la estela de La Casa Real, que va reduciéndose de tamañu a midida que van surdiendo los corruptos.
El problema, entós, ye’l d’una sociedá podre, onde medra’l más «avispáu», el que s’escaquea de les sos obligaciones fiscales, el que fai trampes pa que’l so fíu pueda entrar nel colexu que quier, el qu’entruga que si «con IVA o ensin IVA», el que nun te da, sinón la pides, la factura polos sos servicios profesionales… Too eso, que pue paecer normal, que vemos como normal, ye’l principiu de la pirámide de la corrupción. Podría resumise na falta d’una ética personal, d’una conciencia individual na que nun deberíen influyir los usos y costumes -pervertíos- que ves al to llau. Pero eso ye quedar como un fatu: «Coime, si toos lo faen, porque nun voi facelo yo, sería bobu». Nesi «toos lo faen» asítiase la madre del corderu. Poro, de magar un va xubiendo y allugándose en distintes plataformes sociales, culturales o polítiques, esa mentalidá, interiorizada, va faciendo’l so llabor. Asina vemos, neses pequeñes escales, el que queda con perres de la comunidá de vecinos, o de la ong, o del Niemeyer… y, claro, cuando un se ve con poder de verdá, cuando tien un cargu del que dependen perres de verdá -permisos, recalificaciones, instalaciones empresariales, etc. etc.- esi: «toos lo faen» que lleven dientro sigui furrulando… pero a lo grande.
Lo primero qu’hai que cambiar, entós, ye la propia conciencia individual. El dicir: «otros fadránlo, pero yo non» . Esa moral individual, esa ética
cívica que nada tien que ver con relixón dalguna, sinón col comencimientu de qu’hai que conservar unos valores sociales pa que les coses funcionen bien, esi ye’l primer pasu pa evitar la corrupción. Y que nes families y nes escueles se fale d’eso, de la importancia del ser éticu individual, al marxe de lo que faigan los demás. Esa ye, al mio xuiciu, la única manera de que dalgún día, nun voi dicir que la corrupción desapaeza porque nun soi nada «roussonianu», pero sí, polo menos, se caltenga nunos llímites controlaos. Porque lo d’agora, al pasu que lleva, va a acabar cola propia democracia. Lo qu’ocurre ye que, ye más fácil criticar que dar exemplu. Y asina siguirá la cosa, camudando a unos corruptos por otros. En fin, como dicimos perequí: «voces en castañéu».
