Nun puedo con ello. El clima que se respira, dende va yá tiempu, nesta España tuya, nesta España nuestra, resúltame tan afogante, tan contaminante, que nun puedo con ello. Entiendo que’l tema de la corrupción nes altes esferes ye esmolecedor y que ta poniendo en custión a la propia democracia. Ye, pues, pernecesario denunciar les coses, intentar esclariales y, una vez esclariaes, facer que paguen por elles los sos autores. Pero ye que lo d’estos díes ye demasiao. Dende pela mañana a la nueche too ye afisiante: les radios, les televisiones, los distintos periódicos, tanto de papel como dixitales… nun paren col ruxe-rux de la corrupción, y de los papeles, y de les cuentes nel estranxeru, y de les implicaciones gubernamentales o Reales. Almorzamos col sastre de señor Gürtel, xintamos col «palmáu» duque de Palma, cenamos col ayalgueru tramposu, y suañamos cola plana mayor del PP, glayando dende una de les calderes de Pedro Boteru menaciándonos cola triente y los cuernos. Nun puedo con ello.
Quiero un pocoñín de paz, porfa. Quiero que me dexen descansar de tanta ponzoña y tantu velenu que ta evelenándome a mi tamién. Que se faigan les denuncies y que se dexe trabayar a los xueces. Y que los periódicos, y la tele, y les radios me falen de coses pequeñes, ensin importancia: que s’ inaugura un parque, que se llibera a una tolina que quedó varada na playa, que s’iguó un árgayu qu’había na mio cai, qu’un grupu de teatru representa una obra n’asturianu nel centru municipal de l’Arena… Coses pequeñes, cotidianes, que nos fain seguir viviendo con normalidá, que nos axuden a llevantanos de la cama, a tomar un cafetín con una tostada y a salir a dar una revolada cabu la mar. Nun quiero saber quiénes son los nuevos Bárcenas, o cuál fue l’últimu delitu del xenru del Rei, o qué políticu del PP, o del PSOE armóla más gorda. Prefiero que se lo lleven too. Daveres. Qu’arramplen con toa España y que la dexen fecha un desiertu. A ver si entós, cuando yá nun haya nada que robar, puedo descansar d’una vez. Porque lo único que me petez agora, ye un migayín de paz, porfa.
