Daquién pue pensar que la política ye una actividá fácil d’entender, pero a mi siempre se m’atravesó, como eses asignatures a les que-yos tienes manía y nun hai manera d’aprobales. Estes caberes eleiciones afondaron entovía más na mio perplexidá a la hora d’entendela. Poro, fáigome delles preguntes a ver si llantándoles por escrito m’axuda a ver la lluz, como a San Pablo cuando lu tiraron del caballu.
La primera ye de bultu: ¿Por qué siempre ganen toos les eleiciones? Si unos ganen, entenderíase qu’otros tienen de perder. Pues nun ye asina. Tengo delantre mi’l diariu El Comercio del llunes 8 de Xunu, dia siguiente a les votaciones. Portada. Semeya de Rajoy y Mayor Oreya. Títulu: «Trunfu electoral, etc.» Páxina 27. Semeya de Fernando Llastra y María Lluisa Carcedo. Títulu: «María Lluisa Carcedo abrázase a F. Llastra tres conocer los resultaos» (dambos sonríen). Mesma páxina. Semeya de Xesús Iglesies y plana mayor d’I.X. Títulu: «Somos la primer federación d’ IX en porcentax de votos». Páxina 23. Semeya de Rosa Díez, Sosa Wagner y F. Maura. Títulu: «Allegría». Los citaos «cellebren los resultaos». Llueu’l periódicu pasa a Internacional onde se repite la mesma ceremonia. Pregunta: ¿Quién perdió? Bono, abúltame qu’esa sí la sé.
La segunda ye de fondu: ¿Cómo pue ser que, en plena crisis del sistema capitalista, ganen les eleiciones europées los partíos de Centru-Derecha? Paecería normal, pa cualquier persona medianamente intelixente, que si la situación ta iguándose gracies a la intervención de los estaos na economía, pa sofitar les instituciones económiques y les garantíes sociales y llaborales, coses toes elles de gobiernos d’izquierda, fueren estes fuerces les que ganaren. Pues non, ganen les dereches ya inclusu les estremes-dereches, cuya filosofía ye’l lliberalismu económicu (o seya la non intervención del estáu), la baxada d’impuestos, la desregulación del mercáu llaboral y la desproteición de paraos, pensionistes y otra xente en situación crítica. Sigo sin entendelo.
La tercera ye d’ámbitu asturianu. ¿Cómo vuelven a ganar los partíos que tán llevándonos, dende va munchu tiempu, a los últimos puestos d’ente les comunidaes del estáu, esbarrumbando la industria, el campu, el mediu ambiente, la cultura, la llingua…? Perplexidá absoluta.
La cuarta ye casera. ¿Cómo pue ser que, dempués del mesmu tiempu que lleven gobernando los d’antes, nun seyamos a articular una fuerza asturiana, al rodiu de media docena de puntos apautaos por toos, que seya a motivar a la xente, a promover un migayu d’illusión, y tengamos que siguir asistiendo a les pelées cainites, a los personalismos, a les descalificaciones, a los masimalismos políticos, en llugar d’a trabayar en comuña con una visión desinteresada de País? ¿Ye eso tan difícil? ¿Nun fueron a facelo n’otros llaos? Plasmu total.
La quinta supón l’ocasu de les ideoloxíes, porque ¿qué ideoloxía tien esi partíu recién fundáu de UPyD (Unión Progresu y Desarrollu (?) Unión Patriotes y de Dereches (?) Unión Pol Debalu…) que saca 450.000 votos en tol estáu? ¿Ye de dereches, d’izquierdes, de centru, islamista…? A parte refugar tola riqueza llingüística peninsular, menos el castellán ¿ónde se sitúen dientro l’arcu políticu esistente? ¿O ye que tán fuera? ¿Por qué hai asturianos que los voten? ¿Qué piensen sobre’l nuestru país, la nuestra historia, la nuestra cultura, los nuestros problemes…?
Última pregunta, pa nun fadiar demasiao. Ta bien que los medios de comunicación se vuelquen colos partíos más poderosos. Pero en tolos díes de campaña nun poner nin una entrevista, nin una noticia, nin un artículu sobre los partíos nacionalistes asturianos ¿nun ye demasiao? Anque fuere nun requexín del periódicu. ¿Cómo va la xente a votar a unes fuerces «inesistentes», desconocíes por mor de la so invisibilidá pública? ¿Habrá, tamién, culpa de los propios partíos que nun dieron esa batalla (la de los medios), abellugándose nesos círculos afines que nun tienen nenguna repercusión fuera d’ellos?
Bono, con too esto ta mui nidio que sigo ensin entender un res de política, pues toes estes preguntes de xuro que sabe respondeles cualquier neñu de teta. O seya, que voi siguir aplicándome a ver si un día consigo aprobar esta asignatura pendiente. Otru día más.
