Pues sí, tal y como diz el so himnu: «Alemania sobre todos». Ye la nueva y merecida campeona del mundu, pesie a que tuvo de sudar la camiseta pa llogralo. Arxentina fue una perbona rival. Yo tenía un poco’l corazón dividíu ente los dos equipos: tengo dalgunos bonos amigos arxentinos y perellí hai munchos restos asturianos y d’otros paises españoles, amás de la llingua y otros nicios comunes, pero Alemania prestábame muncho pol fútbol que practicaba que merecía un premiu. Abúltame que, a la fin, ganó’l que fizo más merecimientos. Destacar polos ganadores l’aspeutu defensivu, con un gran porteru (anque ayer fizo un penalty sobro Higuain de llibru), un Lahm incombustible y un par de centrales bien asitiaos y seguros. El llateral izquierdu, escesivamente duru, atacó meyor que defendió. Un bon centru’l campu, nel que’l llueu incorporáu Götze tien muncha más calidá que Khedira y Kramer, que salieron enantes qu’elli. Kroos, un gran pasador anque xuega andando, tolo contrario que Schweinsteiger que se mete en toles pelées y un Özil que tampoco nun se mató muncho, cubriéndose con dalgunos «pasiquinos». Y alantre un estupendu Müller, delanteru polivalente y Klose que yá nun ye’l que yera anque caltién entovía ciertu peligru.
Frente a ellos, Arxentina fizo un mui bon papel. Destacaría sobre too el mundial que fizo Mascherano, nun puesto más afayaízu que’l de central que-y ponen nel Barça. Bien porteru y defenses, mui seguros siempres. Y de mediu’l campu p’alantre gustóme muncho Lavezzi, rápidu ya incisivu. Higuain falló’l gol del mundial y sólo por eso ya tapeció tol llabor anterior. ¿Qué tuviere pasao si Arxentina se pon per delantre…? D’elli fue la culpa. Y Messi… Yá falé delles veces de Messi, xugador de gran calidá pero pal que tienen que xugar toos. Alcontrélu floxu, tristón, ensin allegría nel xuegu, anque fizo tres o cuatro xugaes del so estilu. Paez como cansu de tantu partíu, tantu campeonatu y tanta responsabilidá. Necesita descansu, sobre too mental. Un par de cosines al rodiu de la retransmisión de Tele Cinco: Los llocutores ficiéronla como si fuere pa la radio y nun tuviéremos viendo les imáxenes. Una cosa pesadísima, enllena detalles que víamos na pantalla, con un volume de 200 decibelios penriba l’alloriu. Y llueu una pronunciación perronera de los nomes alemanes, principiando pol «Churre», que debía ser Schürrle. Podíen pidir un poco axuda.
Del restu d’equipos: Francia fizo partíos bonos, cumplió. Como cumplieron abondamente Arxelia, Colombia, Uruguay y Costa Rica. Brasil un bluff. Ya se vio cuando aquel árbitru xaponés tuvo que regala-y el partíu. Yo dixi d’aquella: Brasil ye Neymar y diez amigos. Y asina fue. Allégrome pol babayu de Scolari que siempres fue un envidiosu y un mala lleche. ¿Cómo desplica que Costa nun tuviere puestu nesi equipu? Y España, col so tiqui-taca de mentires, afaláu pola prensa nacional y que fizo un gran ridículu ante’l mundu enteru. Otros, por menos -como’l casu d’Italia- echen al seleicionador. Pero equí tenemos «aforaos» hasta nel fútbol. En fin, señores, hasta Rusia con amor.