Tolo que vemos vémoslo colos güeyos, claro, pero tamién col corazón. Equí’l términu corazón atropa una serie d’otres coses intanxibles que llevamos siempres con nos: cultura previa, estáu d’ánimu nesi momentu, espectatives prósimes y futures, salú, compañía… por dicir dalgunes coses desordenaes, asina como al debalu. Poro, anque veamos la mesma cosa n’ocasiones distintes, nunca será la mesma cosa. Nunca la veremos igual.
Faigo estes filosofíes (de caleya) al enterame de la muerte d’una de les actrices que más quixe. Non de les que más me gustaba físicamente (yá falé de delles nesti mesmu blogue) sinon de les que me prestaría tener como amigues, pa tomar dalgo con ella, echar unes parrafaes y reíse un poco. Un poco nesi plan. Y too ello vienme dende que la vi nuna película que pa min fue «icónica» (que dicen agora los intelectuales): «Annie Hall».
«Annie Hall» vila en Madrid cuasi’l día del estrenu, y yo taba pasando por un momentu emocional mui complicáu. Nun voi entrar en detalles que a naide interesen, anque sé qu’hai munchos curiosos ente los llectores. El casu fue que, aquella película, aquella actriz, aquel actor y direutor, dexáronme una fonda buelga que tovía sigui conmigo y que sal a rellucir en momentos puntuales. Agora ye un d’ellos. Nun sabría desplicar meyor el carauter d’aquella buelga, porque ye, dacuando allegre, dacuando murnia, pero tien muncho que ver col mio estáu d’ánimu y el de dalguna otra persona. Pienso que too esto, en realidá, nun interesa a naide más que a min, pero tenía necesidá de dicilo porque Diane Keaton, anque ella nun lo supiera, tuvo muncho que ver en too. Ella, col so sentíu del humor, col so aspeutu informal, con esa agudeza que da la intelixencia de los que nun presumen d’ella. Envidié muncho a Woody Allen pesie a que’l probe nun termina con ella. Pero eso, a la fin, ye lo de menos, anque nun lo pareza. Lo importante ye lo que se vivió, ellos y yo, que va a quedar ehí pa recordar un día como hoi, nel que un s’atopa dafechamente señaldosu. ¡Gracies, Annie Hall! ¡Gracies, Diane Keaton!
