Necesitaríemos un espaciu cuasi por enteru dedicáu a reseñar los fallecimientos que, cada día, se producen. Una especie de necrolóxica continuada porque, sobre too a la mio edá, nun hai espaciu de tiempu en que nun muerra dalguien a quien conocíes, o del que oyisti falar anque fuere pola prensa, cine o televisión. Nun curtiu espaciu de tiempu tuvimos dos anque de mui distintu calter.
Morrió la simpática y bona actriz Conchita Velasco, que yera una lluz dientro’l panorama cinematográficu español. Sobre too fue una lluz nos escuros años del franquismu y posfranquismu. Relegada a papeles clásicos pa les muyeres, pareya de, muyer de, asistenta de… llogró en toles sos películes gana-yos el tarrén a esos papeles y destacar penriba de los sos compañeros de repartu, faciéndose la verdadera protagonista de la película. Fizo tamién, cuando pudo, papeles más serios, inclusive dramáticos nos que punxo en valir la so calidá como actriz, pero yo sigo quedándome con esos otros que paecen más fáciles, pero que nun lo son. Porque caltener el tipu en munchos d’aquellos «bodrios», destinaos al olvidu inmediatu, tien munchísimu méritu. Anque nun me paecía una muyer mui «sexy», siempre estuve secretamente namoráu d’ella, pola sonrisa, allegría y espontaniedá. Cantar, lo que se diz cantar, nun cantaba «un riche», pero quedó como amuesa simpática esa «chica ye-ye» que yá tien un puestu na memoria sentimental del País.
Si Conchita yera la lluz, l’otru muertu, Henry Kissinger, yera la escuridá. Suciu manipulador, maquiavelu vendíu a los gobiernos más corruptos (empezando pol suyu) del continente americanu, golpista, conseyeru áulicu que derrocó a xente tan honrada y valiosa como Salvador Allende, llegáu a la Presidencia de Chile por votación popular, nun echaré una llárima por elli nin perderé más tiempu en condergalu. Nun mundu llocu ya inxustu como ésti, llogró que-y concedieren el Premiu Nóbel de la Paz, que sería pa que’l resto los premiaos tuvieren renunciao a él. Si por mí fuere, oxalá estuviere d’asesor del mesmu Diañu, ayudándolu a tizar les calderes mientres glayaba «más madera, qu’esto ye la guerra».
Descanse en paz, doña Concha Velasco, y nun descanse en paz Henry Kissinger. Esa ye la mio oración.
