close
Doscientos años ensin Xovellanos

Doscientos años ensin Xovellanos

2011-01-08BicentenariuXovellanos511Visitas

Fuxía de los franceses que taben allegándose a Xixón. Embarcó nun pequeñu barquín xunto col so amigu del alma Pedro Valdés y otru grupu de xixoneses  camín de Galicia. Nun pudo llegar. Una tormentona obligólos a desembarcar en Puertu Vega. Pedro Valdés llega mui enfermu y muerre namás baxar a tierra. Él, ensin conocer la muerte del so amigu, y afectáu por una puxovellanoslmonía, dexa tamién d’esistir al pocu tiempu. Ye’l 29 de payares de 1811. Xovellanos acababa morrer.

Cellébrase, pues, esti añu, el doscientos cabudañu de la muerte del más illustre de los asturianos. Pa ello, pa conmemoralo, hai formada una pergrande comisión na que tán representaes les más altes instituciones asturianes (Principáu y Conceyu de Xixón), xunto a otros notables personaxes, a títulu individual o en representación. Hai tamién un programa que va a espurrise a lo llargo tol añu. «El añu del Bicentenariu», lu llamen.

Sedría pola mio parte un atrevimientu prexulgar esi programa que, con tantu cencerru, tán espardiendo pelos medios de comunicación, pero sí voi dicir lo que me prestaría que recoyese esi «ampliu» programa: Prestaríame que se falara del Xovellanos patriota asturianu. Del Xovellanos amante de la llingua asturiana, col so proyeutu d’Academia de la Llingua. Del Xovellanos enfotáu nel espoxigue industrial y cultural d’Asturies. Del Xovellanos gran conocedor del so Conceyu, que percorría davezu, y conocedor de tola xeografía del país. Del Xovellanos antitaurinu. Del Xovellanos que, dende’l so fondu pensamientu relixosu, enfrentábase a la Xerarquía clerical, como na so Carta al Obispu de Lugo onde-y diz: «…yo no vivo de diezmos ni cobro mi sueldo en vales…», y recuérda-y: «Sin duda que un obispo debe instruir al clero que le ayuda en su ministerio pastoral; pero debe también promover la instrucción del pueblo, para quien fue instituido el clero y el episcopado». Del Xovellanos perseguíu y enzarráu en prisión por ser políticamente honráu. Del Xovellanos que se reía del so destierru a Asturies porque esi yera’l mayor premiu que-y podíen dar. Del Xovellanos, en fin, qu’escribía n’asturianu, firmando como Antonina de les Cruces, col so amigu Pedro Valdés Llanos que firmaba Theresina del Rosal. De toos esos Xovellanos me prestaría que se falara nesi estensu programa qu’agora principia. Porque ta mui bien que se tornen coses suyes al inglés, pa que lu conozan fuera, pero tamién hai que dalu a conocer na so propia tierra onde, fuera de cuatro tópicos, sigui siendo’l gran desconocíu.