close
El «Bildazu»

El «Bildazu»

2011-04-29Bildu458Visitas

bilduNun conozo personalmente a naide que se presente nes llistes de la coalición ellectoral Bildu. Nun sé mui bien lo que defenden, anque toi cuasi seguru de que nun lo comparto. Nun tengo, pues, nenguna simpatía especial pola coalición nin polo que representen, pero asina y too, camiento que tienen derechu a presentase a les elleiciones y a defender les sos postures. Escribo esto enantes de que’l Tribunal Supremu, y nel so casu, el Constitucional se pronuncien, lo cual tien de ser yá bien ceo. Marcho unos díes fuera d’Asturies y quiero dexar el blogue actualizáu, pese al riesgu de que la realidá pase penriba de lo que yo diga equí. Toi seguru de que dambos tribunales, van facer casu a les presiones sociales y polítiques y a les estayes más reaicionaries de los partidos que vienen gobernando toos estos años, y van a illegalizar toles llistes de Bildu. Unes llistes formaes por unos partíos dafechamente llegales y unos independientes que nun tán «contaminaos» por pertenecer a nada illegal. Ye igual, porque lo que se pretende ye illegalizar una forma de pensar, una postura política que, nun porque non se comparta tien de ser esaniciada.

Ta claro que la xente de Bildu quier la independencia d’Euskadi. Tamién la quieren CIU o’l PNV. Pero hai que recordar que la Constitución abelluga cualquier postura política, defendida de forma pacífica. La Constitución diz, por exemplu, qu’España ye una Monarquía (parllamentaria, pero Monarquía), pero nun prohibe a los partíos republicanos, y l’otru día desfilemos nuna manifestación detrás d’una bandera republicana. La idea d’illegalizar a Bildu porque dicen qu’ETA diz que-y interesa tener esa tapadera llegal nun se tien. Imaxinemos por un momentu que a ETA-y interesare que se votare al Partíu Popular por cuestiones d’estratexa. ¿Sedría esi motivu pa illegalizar al PP? Recordemos que durante la Dictadura franquista, munchos grupos clandestinos teníen la táctica d’infiltrase nos sindicatos verticales, pa aprovechase de la tapadera. ¿Tendría Franco qu’illegalizase a sí mesmu?  En tou casu, si nalguna llista hubiere dalguna persona perteneciente a dalgo illegal o clandestino, que se suspenda esa llista, pero nun toles demás, porque eso ye dexar ensin voz a una parte, quiciás pequeña, pero con tolos sos derechos, de la sociedá vasca. Y tien de ser dalgo mui nidio y, al tiempu, mui grave, pa nun dexar exercitar un de los derechos capitales de les sociedaes democrátiques, como ye’l del llibre pensamientu y la defensa pública d’esi pensamientu. Sacante a los violentos y a les acciones violentes, cosa que Bildu yá condenó, por activa y por pasiva. Danme más mieu los recortes que se tán dando nes llibertaes públiques, que la defensa d’unos postulaos que nun tienen por qué compartise pa ser toleraos

Tags:Bildu