close
El «Foru Luxemburgu»

El «Foru Luxemburgu»

2011-03-09CascosForuMarqués684Visitas

francisco-a-cascosCellebróse en lloor de multitúes (y de xuro, tamién en «golor») el Congresu Constituyente del nuevu partíu del señor Cascos, nel que foi escoyíu como candidatu númberu 1 pa les prósimes eleiciones al Parlamentu Asturianu. Yera lo qu’él pidía. Too taba cantao dende l’aniciu, pero hai que guardar les formes. Ye lo mínimo.
Lo malo fue que, namás principiar, ya tuvo qu’echa-yos a los suyos un par de bronques. ¡A quién se-y ocurre decidir nada ensin tar el «xefe» presente (perdón pol simil falanxista)! Asina que, los que pela mañana tuvieron entreteníos votando qu’hubiere primaries, y que’l mandatu nun durare más d’ocho años, tuvieron que «recoyer veles» y poner el barcu «al pairo». Porque llueu llegó don Francisco y dixo qu’eso ya se vería más alantre. O seya, cuando él diga. Democracia orgánica.

Como partíu nuevu, y reducíu al ámbitu asturianu repasé, na prensa, lo qu’ellí se dixo pa ver la idega, anque fuere sólo teórica o retórica, que teníen d’Asturies. Lo qu’opinaben de la so cultura, de la so llingua, de la so identidá como pueblu. Dalgo que siempre se diz por quedar bien, y ver de garrar dalgún votu de los despistaos: ¡Nada! Nin una sola referencia a nada de lo nuestro, de lo que nos diferencia de los otros pueblos d’España, de lo propio, de lo autóctono. ¡Coime, anque sólo fuere porque ye un partíu asturianu, nunes eleciones asturianes! ¡Nada! Faló, eso sí, de que quería facer d’Asturies daqué como Luxemburgu, que debe paece-y lo más moderno qu’atopó. Nun tenía que dir tan lloñe.sergio-marques-y-cascos Abastaba con que quixera facer a Asturies como dalgo de lo que fue, porque nun siempre na nuestra tierra gobernó el PSOE (anque dacuando nos lo paeza). A dalgo como lo que, anque malamente, s’estudia n’ Historia Medieval. O n’Historia Moderna. Un país que fue Reinu, con un pasáu, una cultura y una llingua. Y sobre too, con una dignidá y un respetu. Igual ye que s’escaeció d’ello.  

Dióme pena por dalgunos ilusos, que nel so día militaron en grupos asturianistes, y que corrieron a abrazar la causa «casquista» camentando atopar ellí el so abellugu. Nomes que se baraxaron pa xustificar l’asturianismu del nuevu partíu. Siéntolo por ellos, porque agora va a sonanos un poco a «coartada» per dambos llaos. Per parte del partíu, pa travestise d’asturianu. Y per parte de los que s’apuntaron, pa xustificar la so priesa en xubise a dalgún «carru» vencedor. ¡Oxalá tea enquivocáu y resulte que Cascos ye un asturianista de primer llinia! Pero los anicios nun son demasiao bonos. Habría, tamién, que facer un apartáu especial pa los que hasta agora militaren na URAS y tán pasándose al Foru. Dellos ocupando entovía cargos públicos. Cascos fue’l señor qu’echó a Sergio Marqués del P.P. provocando una crisis institucional de gran fondura. Marqués, una persona digna,  marchó al destierru con dellos fieles y creó la URAS. Agora, dalgún d’aquellos fieles  véndelu por cuatro maravedíes pa pasase, con armes y aperios, al enemigu. ¡Qué ceo s’escaez la Historia y qué inxusta ye la xente!