La referencia que dio la prensa del discursu del señor Álvarez-Cascos (nun lu sentí en direutu) paecióme abondo deceicionante. Recetes vieyes neolliberales, como’l privatizar lo público, y nenguna referencia seria a un tema que debiere ser prioritariu pa un partíu «rexonalista», les señes identitaries. Unes señes identitaries que tienen de tener, como bandera, la llingua propia. Nesti casu, la llingua milenaria de los asturianos.
De lo primero, Cascos dixo que quería privatizar namás l'»escesu» de lo público, pero cuálo ye lo qu’escede, ¿lo que nun ye rentable? ¿lo qu’interesa remanar al mundu de lo privao? Respeuto a lo primero hai que dicir que la rentabilidá d’una cosa nun siempre hai que la valorar en términos económicos, hai otros elementos de xuiciu, como la aportación social o cultural. La empresa d’autobuses de Xixón EMTUSA, podría tener menos deficit, o inclusive superavit, si subiere los precios, y nun ficiere rebaxes a xubilaos, mozos o xente ensin medios, pero esi servicio «social» que presta ye impagable. Lo mesmo n’otros temes que la empresa privada abandonaría por nun dar perres.
La eleición de colexu por parte los pás ye mui guapa… pa que los ricos escueyan los colexos elitistes. Cuando los rumanos o marroquíes pueda escoyer llibremente los Xesuítes o l’Asunción, creeré n’ello. Lo que se pretende ye dexar la escuela pública pa los probes y marxinaos, y la privada, pero con perres públiques, pa los ricos. ¡A otru perru con esi güesu! Lo mesmo pasa cola sanidá y los servicios esternalizaos. Munchu güeyu que’l problema ye paecíu: dexar lo que nun ye rentable pa lo público y lo que sí lo pue ser pa lo privao.
Y nel tema cultural… un páramu. Nin una sola idea valiente o curiosa. Más de lo mesmo, como los sociatas. De la llingua, la única referencia foi la «desarrollar la Ley de Uso y apoyar a los escritores». Nin siquiera a entrugues concretes d’Izquierda Xunida hubo rempuesta. Pues bien, a min que soi escritor, nun sé ónde me querrá dexar «apoyáu», pero si lo que quier dicir ye mirar por mí, sofitame, dignificame… la meyor forma de facelo ye declarando oficial la Llingua Asturiana. Sí daveres lo fai, sentiréme «apoyáu». Pero abúltami qu’eso, y otres munches coses, nun tan nel guión del rexonalista señor Cascos.
