Con un ésitu grande ya inesperáu, el llamáu «movimientu 15-M por una democracia real agora», salió a la cai, al marxe de partíos, sindicatos o grupos organizaos y al marxe, tamién, de los grandes mass-media de periódicos, radios o televisiones. Foi’l trunfu de la espontaneidá, d’internet, d’una improvisación creativa y, penriba de too, de la fartura de tantos años de ser los paganinis d’un sistema cada vuelta más inxustu, cada vuelta más inhumanu.
Agora, entovía aguanta la «resaca» d’aquellos díes. Dalgunes places siguen ocupaes, los campamentos ellí asitiaos siguen dando testimoniu de los qu’avecen a llamar, con motivu, «indignaos», pero… la cosa ta nestos momentos nuna encruciyada. ¿Qué facer agora? ¿Pa ónde tirar? ¿Qué camín siguir?
Los miles de persones de les places principiaron a amenorgar, camudándose nunos cientos. Los vecinos de les acampaes, que nun primer momentu acoyeron a la xente con ciñu y-yos facilitaron medios pa sosistir (mantes, comida, simpatía…) tán empezando a cansar de tenelos ellí y vuélvense escontra ellos. Na Puerta’l Sol, de Madrid, por exemplu, los pequeños comerciantes de la zona, la xente que vive o trabaya perellí quéxense, nun sólo de les incomodidaes que sufren, sinón de les perres que tán perdiendo al tar aquello ocupao. Y, pero otru llau, les acampaes tampoco paez que puedan ser indefiníes. Sólo’l pocu tactu y la metedura de pata de coses como la carga, absurda y desproporcionada de los Mossos d’Escuadra, en Barcelona, son a reactivar per unes hores a un movimientu que, si nun llogra dir hacia adelante, tenderá a facelo hacia atrás.
Faen falta nueves idegues, nueves propuestes, nueves aiciones. Dalgunes lleguen por internet, y hailes interesantes.
Pero la mesma espontaneidá y falta de direición del movimientu, que supunxo un valor positivu nun principiu, vuélvese escontra él al atopase, tamién, con una falta de «liderazgu», yo creo que necesariu. En cualquier movimientu, por espontaníu que seya, dalguién (persona, grupu de persones, mandu colexáu, etc.) tien que se poner al frente y dirixir aquello, porque nun toos puen mandar, nin toos tán capacitaos pa ello. Necesítase’l respaldu de la xente, pero non que tol mundu dirixa porque asina les coses terminen morriendo.
La mio humilde opinión ye qu’hai que desaloxar les places. Hai un ciertu agotamientu. Volver a casa, siguir coneutaos y preparar otres nueves aiciones, coleutives, sorpresives, que vuelvan dar la iniciativa a dalgo mui interesante y que pon en custión esa opinión xeneralizada de que a la xuventú, güei en día, nun-y interesa nada nin llucha por nada. Quiciás seya porque lo que se-yos ufierta nun-yos convence. O porque quieran dir más lloñe, y cambiar esta sociedá tan inxusta por otra más solidaria y onde se respete al ser humanu y non se lu esplote. ¿Utopía? Bono, tampoco nun ye malo lluchar poles utopíes. Gracies a elles lleguen a algamase coses que nunca se suañare con elles. La Historia ta enllena d’exemplos.
