Xugóse ayer l’últimu partíu del sieglu que toca esta selmana. D’un Real Madrid-Barsa siempre hai qu’esperar lo meyor… ayer nun lo hubo. Abastó un Madrid eficaz, bien asitiáu nel campu, cola defensa mui adelantada (cuando pudo) y un contragolpe bien afiláu, pa derrotar a un Barcelona desconocíu, nuna versión deceicionante de sí mesmu.
Volvió a vese la «messidependencia», pero nun sólo dientro del campu, sinón, como yá tengo dicho munches veces, fuera d’él. Les aliniaciones fainse «a mayor gloria de Dios», y yá sabemos que’l que nun xuega pal «divo» acaba separtáu del equipu. Otros dos delanteros pasen a la categoría de «malditos», Alexis Sánchez (ayer na grada) y el nuestru Villa. Siguen el camín de tolos anteriores «quemaos» pol «efeutu ocalitu» que supón Messi: Ronaldinho, Etoo, Ibrahimovic, etc. Alexis yera un gran xugador cuando aportó al Barsa. Agora nun da una a dereches. De Villa ¿qué vamos dicir?: el másimu goliador de tolos tiempos na Seleición Española. Pero hai que-y pasar el balón a Messi. El problema ye qu’agora hai «overbooking» de «pasadores» nel centru’l campu del Barcelona, y xugadores tan bonos como Cesc Fábregas, Xavi, Iniesta, Busquets, etc. acaben estorbándose cuando, amás, Messi, en vez de desmarcase en cata del gol, baxa a recoyer el balón a la metada’l campu queriendo facer esos famosos «eslaloms» que’l contrariu ya-y tien pillaos. Toos estos defeutos nun son nuevos, lo que pasaba yera que, pese a ellos, hai tanta calidá nos xugadores del Barsa, col propiu Messi a la cabeza, que los escaecíen y ganaben igual. Pero agora hai un baxón físicu y anímicu enorme. La defensa, nun hai partíu que nun encaxe dalgún gol, y nun se créen les ocasiones que se creaben enantes. Pujol anda lentísimu, yá nel final de la so carrera, Alves nun ye nin la so solombra y Jordi Alba, gran xugador, piérdese en protestes y malos moos. El centru’l campu nun atoxiga como antaño y Messi ta nun bache, normal
cuando se xueguen tantos partíos, un día sí y l’otru tamién.
Cúmplese, amás, otra cosa que tengo dicho munches veces. Escontra la opinión de munchos «téunicos» que nun callen con eso de «la posesión», como si falasen del «diañu», o seya, eso de tener muncho tiempu’l balón, hai equipos que nun lu quieren. Que prefieren ser dominaos pa llueu salir al contrataque como fleches. Eso facía’l Valencia que quedó Campeón de Lliga y llegó a dos finales de la Champions, y eso fai agora’l Real Madrid. Utilizar un contrataque direutu y mortal que noquea al contrariu. Claro que pa eso tienen al meyor xugador del mundu con campu per delantre: esi «presumíu», babayu, insoportable ya insultable (tien toles condiciones pa ello) Cristiano Ronaldo. Un xugador como nun hai otru.