La UNESCO, la organización de la ONU pa la cultura, acueye distintes formes de cultura de los pueblos, catalogándoles embaxo’l títulu de «Patrimoniu de la Humanidá». Cuando se trata de coses materiales (monumentos, edificios…) asina lo fai notar, pero n’otros casos lo que la UNESCO recueye y quier resaltar, son patrimonios culturales «inmateriales». Estos, lóxicamente, son mui estremaos y puen adoptar munches formes y maneres. Na última llista de los aceutaos como talos taben, ente otros, el Flamencu andaluz, los Castellets catalanes y el cantu de la Sibila mallorquín. Nada que dicir del Flamencu que, podrá gustate más o menos (a min más bien menos), pero que representa un mou de ser y de sentir mui propiu d’un pueblu. Lo de los Castellets paezme que, como cuasi tol folklore catalán, que ye d’antiayer, ta mui supervalorao, dicho seya con tol respetu hacia esi pueblu tan meritoriu. Y lo del cantu la Sibila, con una rapacina cantando un día al añu una cosa, dicen que medieval, pues bono. Pues val. En cualquier casu, felicidaes a los tres.
Agora la entruga ye ¿y n’Asturies nun tenemos nengún patrimoniu inmaterial que destacar? ¿Nada de lo nuestro ye
importante, curioso, interesante, con méritu pa guardase (metafóricamente falando) nesi estoyu de cultures del mundu? ¿O sedrá que les nuestres autoridaes, una vuelta más, nun faen nada por ello? ¿Nun tienen nengún interés no propio, no llariego, no del pueblu? Porque a min ocúrrenseme munches coses «inmateriales» que podíen amosase como dalgo representativo del nuestru país. Por exemplu, la Tonada o Asturianada, el Pericote, el Corri-Corri, la Danza Prima, la Boda Vaqueira, la Regalina, los Güevos Pintos, la Fiesta’l Pastor, los Cuentos Orales Asturianos, la Mitoloxía, los Sidros, los Zamarrones, la Comedia, el Cortexu, el Veloriu, los Xuegos infantiles asturianos, el Refraneru… y déxolo equí porque esti blogue ye llimitáu. ¿Nada d’eso interesa que perdure? ¿Nenguna d’estes coses (y munches más que podíemos poner) tienen, polo menos, el mesmu méritu qu’esos paisanos que se xuben unos enriba otros faciendo dellos pisos?
Capítulu aparte merez, claro, la llingua. Esi patrimoniu inmaterial qu’endolca tolo demás. Que ye la forma d’espresar un mundu, un mou d’atalantar, de pensar, de dicir. Toles llingües tienen de ser Patrimoniu Inmaterial de la Humanidá. Pero el selo, el que la UNESCO-yos dea esa categoría, tien dos dimensiones: una, la del reconocimientu, pero otra, la de la obligación. El reconocimientu de qu’eso que se cataloga asina, tien un méritu, una peculiaridá propia, un valir históricu, antropolóxicu, cultural. Pero al tiempu, qu’eso ye dalgo qu’hai que curiar. Que por esa mesma catalogación, les autoridaes encargaes tienen de mirar por ello. Tienen de lo caltener y meyorar pa tresmitilo a les prósimes xeneraciones. Eso ye lo que, creo yo, que pretende la UNESCO. Poro, cuando la UNESCO diz que la llingua asturiana ta en pelligru desapaición, ye que dalgo falla. Que los responsables de qu’eso nun asocediere, tán faciéndolo mal. Tan incumpliendo la so misión pa con ellos, pero tamién pa cola humanidá. Por eso los avisen.
Ta claro, que los responsables políticos asturianos incumplen colos mandaos de la organización internacional. Nun presenten nada pa que se conserve xunto al restu de pueblos del mundu y lo que, al marxen de’ellos, figura, nun miren pa ello. Poro yo pidiría a les nuestres autoridaes que, si nun quieren que nada de lo nuestro seya patrimoniu inmaterial de la humanidá, polo menos que respeten que seya patrimoniu inmaterial de los asturianos. Nun aspiramos a más.
