Fina, por fin, la campaña pa les votaciones europées. Y digo por fin, porque de les munches campañes a cualquier tipu d’eleiciones qu’hubo nesti país, quiciás ésta fue la peor, la más monótona, la de menos rellumu (si dalguna lu tuvo), la más probe. Unes «figures» de tercer nivel repitiendo unos tópicos ensin conteníu. Nada d’alta política, de debate intelixente, de propuestes nueves pa un mundu en constante movimientu. Aburrimientu, como cuando sentimos cuntar un vieyu chiste del que toos conocemos el final. Dacuando dábame la impresión de tar presenciando l’actuación d’aquellos payasos que salíen na Tele y que decíen al alto la lleva: «¿Cómo están ustedes?» Y tolos neños contestaben glayando al empar: «¡Bieeeen!» Una pena, porque Europa bien merecía un esfuerzu de desplicación, de proyeutu futuru, d’intentu de cambiu respeutu a lo qu’hai agora. D’eso, nada.
Y xunto al aburrimientu, la xenofobia. Una xenofobia, un odiu al «estranxeru» que medra como les plantes. Los partíos más racistes, con los mensaxes más radicales, son los qu’encabecen les encuestes. L’últimu na Gran Bretaña, percima de llaboristes y conservadores. Y equí hai que sentir, pente medies d’unes voltures d’ascu, a un alcalde vascu llamando «mierda» a los emigrantes y diciendo que va a echalos a hosties. Lo curioso ye qu’él mesmu nun tien media hostia y como lu garre un d’esos negros, altos y guapos, que venden bolsos o artesanía diba a pone-y la cara como un «panchón», que ye lo que merecería. Bien ceo se-yos escaez a los vascos (y les vasques) cuando ellos yeren los emigrantes per mediu mundu. Y los asturianos, claro. Nun sólo los famosos «indianos», que trunfaben n’America, sinón aquellos otros que volvíen con una mano alantre y otra atrás, los «americanos del pote»: «Americanu del pote/ ¿cuándo llegasti?/ ¿cuándo vinisti?/ El reló y la cadena/ yá lo empeñasti/ ya lo vendisti…»
En fin, que como dicía aquella pintada que tuvo munchos años nuna muria en Los Campos de Xixón: «¿Y a quién votamos, gallu?». Porque’l partíu que va ganar nestes eleiciones tien un nome mui conocíu: «Abstención» ¡Qué pena!
