Tenemos una casina en Pión que yera de los mios suegros. Ellí xubimos los branos a pasar dellos díes, retiraos del «mundanal ruíu», y ellí tengo yo escrites delles coses de les que voi publicando. Somos socios de la sociedá de festexos (SOFESAN) como mou de participar de les xeres de la parroquia y, cuando aporten les fiestes, agora a la fin d’agostu, baxamos a la costiellada popular y el llunes, que ye’l «fiestín», a la misa, a la procesión y a tomar el vermú nel práu de la fiesta. Anque ye un tema mui priváu, yá tengo dicho n’otres ocasiones que nun soi creyente, pero asisto a la misa y a la procesión como una forma de caltener una tradición, una manifestación de cultura popular. Entiendo qu’esto ye dalgo que nun tien por qué ser compartío por naide. Yo véolo asina.
Los últimos años había, delantre’l campu la ilesia, grupos populares vistíos col traxe rexonal, gaiteros y tamboriteros y munchos neños d’asturianu. Había llanzamientu de voladores qu’acompañaben a la procesión, mentanto les campanes sonaben durante’l percorríu. Too mui típico y con abondu sabor asturianu. Esti añu baxamos cola nieta de tres años vistía d’asturianina pero… nin grupos folclóricos, nin gaiteros y tamboriteros, nin voladores. Poca xente y naide col traxe rexonal. Eso sí, la misa con tres cures y el párrocu riñendo a la xente como aveza a facer tolos años. Tien de ser una custión de carauter. A la fin desplicó, con bastantes malos modos, qu’esti añu nun se gastaben perres en voladores nin en nada «supérfluo» porque había otres prioridaes: el teyáu de la capilla’l cementeriu, la cocina económica o otres obres necesaries. Al salir, la xente reburdiaba escontra’l párrocu y yo tamién. Esti paisanu tien, a lo llargo l’añu, 364 díes pa riñir y p’atropar perres pa otros menesteres, pero’l día la fiesta y el fiestín hai que los conservar col so sabor tradicional, como lo facíen los antepasaos, y los antepasaos de los antepasaos. Col so tastu asturianu, tradicional y festexeru, nel que se xunen lo relixoso y lo mundano, el recuerdu a los que son y a los que fueron. Col coloríu de los vistíos populares, el golor de la pólvora y los culinos que se tomen depués de la ceremonia. Too ello enllena de sentíu a les fiestes patronales, nada ye «superfluo», anque’l teyáu de la capilla’l cementeriu tenga d’esperar un poco más pa ser reparáu. Porque anque él nun lo crea, la fiesta nun ye del cura, ye de la xente. Y como siga per esi camín, va a quedar más solu que la una. Eso sí, col teyáu mui curiosu.
