Bueno, en realidá’l refrán ye «mozu nuevu, pan y güevu», pero podemos treslladar l’espíritu del mesmu a la política. Y ye que, anque entovía nun haya esi gobiernu nuevu, ta prósimu a escoyese. Hai que recordar, por embargu, que’l sistema ellectoral n’España nun ye presidencialista, o seya, qu’equí nun escoyemos direutamente al Presidente del Gobiernu, sinón que son los parllamentarios salíos de les urnes los que lu escueyen. Podría dase’l casu, entós, que nun teniendo la mayoría absoluta (la metada más ún de los parllamentarios) el Presidente del Gobiernu nun fuera’l de la llista más votada, siempre que se xuntaran dos o mas grupos que sumaren esa mayoría absoluta. Pero, bueno, nun yera d’eso de lo que quería falar.
Los asturianos dimos el nuestru votu a cuatro formaciones polítiques. De dos d’elles nada podemos esperar a la hora defender los intereses del nuestru país nel Parllamentu. Dígolo, como diría Felipe González, ensin «acritú». Ellos mesmos puen reconocelo. Los parllamentarios del PP y del PSOE van defender y votar ellí les propuestes de los sos partíos a nivel del Estáu, y los grandes intereses qu’estos tienen pa gobernar o ser oposición. Van representar, entós, non a la comunidá que los escoyó, sinón, repito, a los intereses de los sos propios partíos. A eso que se llama «los aparatos». Pa ello, si tienen que votar a la escontra de determinaos intereses asturianos, van facelo ensin pistañar, porque pa eso se presenten nes llistes del so partíu. Y esto ye asina, y nun tien por qué paecer mal a naide que se diga. Pa ellos hai otros intereses prioritarios. La cosa quedó clara en munches ocasiones, la más sangrante d’elles cuando los representantes del PSOE escoyíos por Asturies, votaron en contra de la «variante de Payares» por intereses de partíu. O seya, que con estos dos nun cuntamos.
Queden, pues, dos representantes escoyíos polos asturianos que nun son de los dos grandes partíos. Llamazares
(I.X) y Sostres (F.A). ¿Podemos pensar que Llamazares va a defender los intereses de los que lu escoyeron el so representante, y llevar la voz d’Asturies al Congresu los Diputaos o va, al igual que los otros, a defender les postures xenerales de la so coalición comandada por esi Cayo Lara? Unes postures que se dicen d’izquierdes (y yo nun lo pongo en dulda), pero que nun tienen por qué coincidir cola defensa de los intereses del nuestru país. El tiempu lo dirá, pero yo póngome no peor.
Y quédanos, pa lo cabero, la esperiencia orixinal (que nel restu l’Estáu nun ye nada orixinal) de tener un diputáu que nun pertenez a nengún partíu «superior». Él ye’l nivel más altu del so partíu. ¿Tendremos, entós, nel Congresu a un representante que seya capaz de llevar la tapecida voz d’Asturies al Parllamentu español? Pudiera ser. O meyor, DEBIERA ser, puesto que nengún otru interés, mayor que’l de la xente que lu escoyó, ta en xuegu. Pero, bueno, «ver veremos», que diz el refrán. De mano, el señor Cascos ya-y regala’l votu de la investidura al señor Rajoy (según él mesmo dixo) ensin pidir nada a cambiu. ¿A cuentu de qué? ¿Nun ye la política l’arte de conseguir coses mediante la negociación? Ye verdá que Rajoy nun necesita’l so votu pa nada, porque tien mayoría pa dar y tomar pero, en cualquier casu, hai que tener la dignidá suficiente pa defender esi votu, quiciás innecesariu pa gobernar, pero que ye’l nuestru, el que’l pueblu asturianu, enquivocáu o non, yos otorgó. Y habría que tener siempre presente lo que ta detrás d’esi votu.
