close
Herrerín

Herrerín

2014-12-01Herrero II444Visitas

HerrerínEl so nome de guerra yera Herrero II, porque nel equipu había otru Herrero, un roxu, zurdu, que xugaba de centrocampista o llateral y que yera Herrero I. Pero nel campu siempres fue Herrerín, nun sólo porque nun yera mui altu, sinón pol so estilu finu, asemeyando pocu físicu lo cuál yera engañoso porque nun se lu desplazaba facilmente. Igual nun destacó tanto por que coincidió nel tiempu con grandes figures como Quini, «el brujo», José Manuel, «el capi», o Tati Valdés, «la maquinona». Les cualidaes de Herrerín como estremu yeren la velocidá y el bon toque de balón, anque nun yera malu desbordando. Nel añu del ascensu a Primera de 1970, siendo entrenador Carriega, collaboró sirviendo goles a embute, tanto a Quini como a Marañón, aquel xugador cedíu pol Real Madrid que nel Sporting xugó de delanteru centru y finó siendo internacional, como estremu, col Español.

Pero Herrerín nun fue namás un bon xugador, sinón tamién una bona persona, la preba d’ello ye qu’entá se lu recuerda con ciñu depués de tantos años y sigue calteniendo una peña col so nome. Agora na so muerte prestaríame unviar a la so familia, sobre too a una de les sos fíes, l’amiga Loreto, un abrazu y el mio más sentíu pésame, col consuelu de que la memoria de Herrero II -Herrerín- va a permanecer pa siempres nesa otra memoria más grandona que ye la de los bonos sportinguistes y, sobre too, la de les  bones persones. Que la tierra-y sea leve.