Hai un chiste que vien aplicándose a los periodistes sensacionalistes, sobre too de la prensa mariella, que diz: «Que’l respetu a la verdá nun t’estropie un bon titular». Quiero dicir agora, porque nunca nun lo fici enantes, que-y tengo un fondu respetu al políticu Gaspar Llamazares, lo cual, lloxicamente, nun significa que tea d’alcuerdu con él, anque en dalguna ocasión asina fuere (por exemplu, la Guerra d’Irak). Paezme, sobre too, un políticu consecuente, cosa que nestos tiempos que cuerren ye un bon eloxu. Y dame pena que la fuerza que representa, IX, ande vexetando pel parllamentu con sólo dos diputaos. Un casu a estudiar nes universidaes del futuru. Y ye dende esi respetu a la so persona, d’onde m’atrevo a asonsañar, col titular d’esti pequeñu comentariu, al casu del periodista.
Ayer, nel Congresu los Diputaos, debatióse (tarde, pero debatióse), la intervención española nuna «faza d’esclusión aerea», col abellugu d’una resolución del Conseyu de Seguridá de Naciones Xuníes. Por una vuelta, tolos grupos parllamentarios votaron nel mesmu sen, a esceición de tres diputaos. Un d’ellos el señor Llamazares. Hai que dicir tamién que, nin siquier dientro del mínimu grupu d’IX, formáu por eses dos persones, hubo alcuerdu, pues una votó a favor de la intervención y la otra, el propiu Llamazares, a la escontra. Paez de coña.
Los argumentos emplegaos pol políticu logroñés afitáronse, sobre too, en xulgar que’l papel de la ONU nun debiere ser intervenir militarmente en nengún conflictu, sinón propiciar la negociación y los alcuerdos pacíficos en toles partes del mundu. Eso a min paezme perbién… si tol mundu lo respetare. La entruga ye ¿y si esto nun ye asina? O seya, si en cualquier parte del mundu, un dictador emplegara la fuerza militar pa esterminar al so propiu pueblu, ¿que tien de facer la comunidá internacional? ¿cruciase de brazos y esperar a ver si lu convence de que dexe de facelo? Llamazares fala d’otros métodos: aisllamientu, nun vende-y armes, inclusive, como se ta faciendo con Cuba, un bloquéu internacional… Coses, toes elles mui interesantes, pero p’actuar a llargu plazu. ¿Qué pasa colos muertos d’agora? ¿Con esos que l’asesín ta masacrando nesti mesmu momentu? ¿Nun tienen les naciones civilizaes la manera de defender a esos probes pueblos del esaniciu?
Ye cierto que nun se fizo n’otres ocasiones, y qu’hai otros paises que ficieron lo mesmo que Gadafi ensin una rempuesta semeyante. Habrá que se lo plantegar pal futuru, porque si una cosa bona tien esta última resolución de Naciones Xuníes ye que va a encartiar como precedente pa ocasiones asemeyaes. Agora saben los tiranos asesinos que dirixen algunos paises, que nun se va a permitir responder, a los que piden llibertá y democracia, cuando non pan y xusticia, colos tanques y les metralletes. Ye verdá que los Estaos Xuníos actuaron en munches ocasiones como’l pistoleru de les películes de vaqueros, provocando y desestabilizando a otros paises. Pero tamién ye verdá que, ensin la intervención norteamericana na II Guerra Mundial, taríamos agora baxo’l poder del III Reich. Como ye verdá que les naciones europees qu’agora se revuelven escontra Gadafi, tienen una prieta historia como paises colonialistes. Too eso ye verdá, pero nun pue sirvinos de coartada pa nun facer nada. Trátase d’enllenar de conteníu a una organización internacional que, si nun val nin siquier pa defender a los ciudadanos indefensos de ser ametrallaos polos sos propios dirixentes, ye que nun val pa nada.
Por último, nun tragamos lo de qu’esta intervención ye lo mesmo que lo d’Irak. Entós, tres «pendencieros» de chigre, cola disculpa d’alcontrar unes armes de destruición masiva que nun había, y ensin nengún pronunciamientu nesi sen de Naciones Xuníes, procedieron a «invadir» Irak pola so cuenta y riesgu. Eso ye lo qu’hai qu’evitar. En cuantes a lo de Llamazares, nin siquier ye una utopía. Porque la utopía obliga siempre a ponese de parte del más débil. Y en tou esti asuntu, la parte más débil ye la del pueblu libiu, que ye al que tán asesinando. Si llueu les coses se tuercen y el permisu de la ONU s’emplega pa otres coses que nun son les señalaes, habrá que tar xixilantes y, nel so casu, denunciales y condenales. Pero esa posibilidá nun pue dexanos ataos de manes y pies, mirando pa otru llau, mentantu se comete un xenocidiu. Lo de «Guerra non» ye mui llucíu, pero hai que se poner nel pelleyu de los que tán masacrando impunemente, nun val con dicilo nuna manifestación na Gran Via de Madrid.
