Pillóme fuera d’Asturies la «minipolémica» sobre’l cambiu de nome de l’Avenida El Llano pol de José Manuel Palacio, primer alcalde democráticu de Xixón, yá fallecíu. Conocía bastante a Palacio pues coincidimos munchu tiempu (años) nes lluches sindicales de la Banca. D’aquella él trabayaba nel Bancu Bilbao y yo facíalo nel Bancu Xixón, llueu Hispano-Americanu. Yeren tiempos de dictadura y, claro, nun había nin partíos políticos nin sindicatos. Funcionaba un Sindicatu Vertical de la Banca, nel que taben apuntaos tolos «fachas» del mundu, anque yá a última hora viose positivo metese dientro pa poder tener un marxe de maniobra, facer propaganda a la escontra y tar un poco «abellugáu» a la hora les represalies.
Palacio tuvo un gran prestixu ente los bancarios (o seya, nosotros) pola so capacidá de trabayu y la so honradez, y fue lo que podíemos llamar un «lider» sindical, enantes de los sindicatos. Cuando llegó la democracia, recuerdo qu’un día convocónos él a media docena d’amigos de los que nos movíemos perehí, pa ver qué podíemos facer nel futuru. Si pagaba la pena afiliase a dalgo o poner en marcha dalgo nuevo. La cosa nun tuvo unanimidá, y él decidió afiliase al PSOE. qu’andaba «en pelotes» en cuanto a militantes y a xente de valir. Ente’l prestixu que tenía, la so esperiencia sindical y política (coses que diben xuntes) y la falta de líderes, nun-y costó muncho algamar puestos importantes, hasta llegar a ser cabeza de llista pa les eleiciones municipales. Yá sabemos pola historia que fue alcalde de Xixón a lo llargo de dos llexislatures siguíes. Na preparación de la tercera, fue cuando se produxo «el golpe de mano» de Tini Areces, con aquella historia d’apuntar a un grupu grande de «paracaidistes» un par de díes enantes de la elleición de candidatu, pa ganala con males artes por unos pocos votos. El restu yá lu conocemos. Palacio abandonó, con dignidá, el partíu y etc. etc. Cuando morrió, dalgún de los «traidores» entovía «pronunció’l nome de Dios en vano».
Tuvo equí na mio casa cuando s’enteró de la putada que-y taben preparando, porque dalgunos de los apuntaos a última hora
procedíen de la empresa CRADY, onde trabayaba la que fue la mio muyer, Tere, y quería tener más datos. La verdá, andaba yá mui «quemáu» con un partíu nel que podíen facese coses asina. Como alcalde pue xulgáselu, polo que fizo, como bien, mal o regular. Pero fue siempre un exemplu de honradez (nun me da más volver a emplegar la pallabra) y de mirar polo público. Nun tenía coche y avezaba a viaxar nel autobús, hasta que, por motivos de seguridá, punxéron-y coche oficial. Cuando facía un descansu nel trabayu, diba a «La Botica», que tenía enfrente, y tomaba un vinu peleón y un pinchu de tortiella. Hasta’l puntu qu’un día mio suegru, José Trancho, que coincidía dacuando con él, díxo-y al camareru: «¡Oiga, ho, pónga-y un Rioja a esi señor, que nun consiento que l’Alcalde de la mio ciudá beba esi vinu.» Colo que tamos viendo nestos tiempos, too aquello paez cosa d’otru mundu. ¡Qué exemplu pa los políticos d’anguañu!
Dende la so muerte, nel añu 2005, el que fue’l so partíu, nun tuvo l’aquello de dedica-y una cai digna de la so ciudá, cuando hubo pa toos y toes. Agora, el gobiernu de Foro, nun sé mui bien el porqué, quixó reivindicar la so figura camudando’l nome de l’Avenida del Llano, pola de Jose Manuel Palacio, embaxo cuyu mandatu fízose’l diseñu y tolos papeleos del gran cambiu de la zona. Pero paez ser qu’un grupu de vecinos, quiero creyer que «espontaniamente», oponse porque-yos trai munches pexigueres y, amás, dicen qu’hai que respetar los nomes tradicionales. Home, lo primero será verdá, pero lo segundo nun lo ye tanto. Esi nome tienlu dende 1990 y, más enantes, eso nun yera nin el Llano. Parte yera «la Campona» (onde nació’l mio amigu José Agüera) y más p’alló «la Kábila», últimu pobláu de chaboles de Xixón. Prestaríame a min que los vecinos aplicaren esi criteriu cuando-yos cambiaron los nomes a media ciudá los socialistes: Carlos Marx, Manuel Llaneza, Pablo Iglesias, Dolores Ibárruri, Playa «de Poniente», etc. En fin, allá ellos. El pueblu siempre tien razón. Pero habría que dir pensando dedica-y al bonu del mio amigu Palacio dalgún otru sitiu de la so ciudá. Anque fuere una Alameda del Parque, como a Manolo Preciado.
