close
La barbarie ente nosotros

La barbarie ente nosotros

2012-10-10Pena de Muerte429Visitas

Güei, 10 d’ochobre, ye’l Día Internacional escontra la Pena de Muerte: esa barbarie qu’entovía sigue viva ente nós. Paises que se dicen civilizaos y democráticos, como EE.XX, continúen calteniendo, en munchos de los sos Estaos, la pena de muerte. Nun digamos nada d’esos otros paises que principien a ocupar los sitios de privilexu económicu, como China, que a un reparto dafechamente inxustu de la riqueza, amiesta la cárcel pa munchos opositores políticos o de conciencia, y tamién pa dellos otros casos, la pena de muerte.

Precisamente güei, llégame un llamáu d’Amnistía Internacional, pa movilizase a favor de Siti Zainab, condenada a muerte n’Arabia Saudí. Esi «maraviosu» sociu internacional, que ye un de los paises onde más aumenten les penes de muerte y el tratu haza la muyer ye más discriminatoriu. Por exemplu, la empresa sueca de muebles IKEA tuvo que cambiar el so catálogu nesi país, y quitar les semeyes de les muyeres qu’apaecíen porque ellí nun-yos gustaba. Siti Zainab, según cunta Amnistía, fue víctima de malos tratos, nun tuvo un xuiciu xustu y dúldase de la so salú mental. Esta muyer indonesia, madre de dos fíos y que trabayaba como empleada doméstica, fue acusada de dar muerte a una persona y nel xuiciu nun tuvo abogáu defensor, defensa consular, nin siquier un traductor p’atalantar lo qu’ellí se dicía.

Hai que presionar pa qu’estes situaciones dexen d’esistir. Los políticos, los diplomáticos, les presiones internaciones puen facer muncho, pero tamién nosotros, al nuestru pequeñu nivel, podemos facer más de  lo que facemos. En primer llugar procurar enteranos, y en segundu denuncialo polos pocos o munchos medios que tengamos. Y a ver si ente toos llogramos que Siti, y una llarga ya inhumana llista, desapaezan dafechu.