Cellébrase esti mes d’abril el 50 aniversariu de la Güelga de los mineros asturianos que paralizó, nun sólo toles esplotaciones mineres asturianes, inclusive les de llugares abondo alloñaos xeográficamente, sinón munches otres industries y negocios de la rexón y de fuera d’ella. Más de 100.000 mineros pararon en toa España, y fálase d’unos 300.000 trabayadores cuntando a otres estayes productives. Hai que tener en cuenta que tamos falando d’un Estáu en plena dictadura, na que la concurrencia a una güelga considerábase un delitu de «Rebelión Militar» , siendo xulgáu por tribunales militares. ¿A que acoyona, eh? Pues asina yera.
La güelga principió por una reivindicación d’un grupu de picadores del Pozu Nicolasa, y bien ceo prendió nel restu los trabayadores d’esa mina y, de siguío, pasu ente pasu, nel restu la minería asturiana. N’aquella domina nun pue separtase ente conflictos llaborales o políiticos, porque sólo pol fechu de selo, yá se consideraben toos políticos. Yeren los díes en que la España franquista pretendía un ciertu acercamientu a Europa y a los paises más democráticos, y aquella güelga, y les que vinieron inmediatamente detrás, dieron una imaxe real de la falta de derechos y llibertaes qu’había nel nuestru país. Ensin derechu de güelga, nin d’asociación, reunión, espresión, etc. Por too ello, y porque nun víen la forma de solucionalo d’otru mou, el gobiernu franquista tuvo qu’agachar les oreyes y llegar a alcuerdos colos trabayadores. Non colos representaos nel Sindicatu Vertical, qu’ellos controlaben, sinón coles comisiones escoyíes polos propios mineros.
Bien ye verdá que durante y depués, hubo enormes represalies sobre aquella clas trabayadora en llucha: despidos,
tortures, cárcel… pero aquel fue’l momentu en que la Dictadura principió a fender, anque entovía tardó munchos años en morrer. Poro, cuando se fala de que la Transición, y el pasu a la Democracia (tutelada) ficiéronla media docena de nomes propios, ta diciéndose una gran mentira y tapeciendo que, de nun ser por toa esa xente anónima, que sufrió nes sos propies carnes les represalies, por esa clas trabayadora, encabezada n’aquellos momentos pola asturiana, ye fácil qu’entovía nun algamáramos los derechos y llibertaes que gociamos. Y que, por cierto, tamos empezando a perder a pasos axigantaos.
Esti miércoles, como recordatoriu d’aquellos fechos, presentóse nel Atenéu Obreru de Xixón la reedición del llibru «Las huelgas de 1962 en Asturias» , coordináu pol historiador Rubén Vega, y onde intervinieron tamién Prado Alberdi, Alvaro Díaz Huici y el Presidente del Atenéu, Luis Pascual. Ente’l públicu, dalgunos de los mineros qu’hai 50 años obligaron a un réximen dictatorial y asesinu a agachar la tiesta… anque sólo fuere per unos pocos meses. El meyor afalagu que podemos face-yos ye nun escaecelo.
