close
La guerra del agua

La guerra del agua

2010-01-11agua en palestina477Visitas

Díxose munches veces, y hasta hai noveles y películes que lo traten, que les guerres del futuru nun van ser pol petroleu, nin por otres primeres materies codiciaes poles potencies actuales, sinón que van ser por un bien cada vuelta más escasu y más necesariu: l’agua. Pero’l casu ye que, col silenciu o la indiferencia de los «grandes», esa guerra ya principió en munchos llugares del mundu. Un d’ellos ye Palestina.mapa-agua-palestina2

El pueblu palestín de Gaza y Cisjordania vive, dende hai años, con una cantidá d’agua dafechamente menor que’l mínimu recomendáu pola Organización Mundial de la Salú pal consumu diariu. Y esto nun ye porque nun la haiga, sinón pola política discriminatoria que ta aplicando esi país, un día víctima y agora verdugu, que se llama Israel.

Un país que ta amenorgando’l drechu de los palestinos a un nivel de vida afayadizu. A una alimentación, a una vivienda, y a un trabayu dignos. A la propia salú, y que, dende va tiempu, ta torgando tamién l’accesu al agua y al desarrollu de les instalaciones hídriques necesaries. Ye Israel la qu’afita la cantidá d’agua que los palestinos puen sacar del acuíferu compartíu en Cisjordania, axudicándo-yos una cantidá nidiamente menor que la d’ellos, y que nun cubre les necesidaes básiques de la población. Contróla-yos la recoyida del agua de lluvia y nun puen escavar nuevos pozos nin reparar los antiguos ensin el so permisu. A esti respeutu hai que recordar que’l Comité de les Naciones Xuníes pa los Drechos Económicos, Sociales y Culturales declaró en Payares de 2003 que l’accesu al agua ye un drechu fundamental, y que l’agua ye un bien social y cultural, nun sólo una mercancía. Lo mesmo sopelexó’l Comité de Drechos Humanos de la ONU. Pero nel casu palestín los datos falen por sí solos:

Israel consume’l 80% de los recursos hídricos de Cisjordania. Los palestinos el 20%.
El consumu mediu d’agua palestín ye de 70 litros por persona y día (en dalgunes comunidaes nun llega a los 20 l.) L’israelí ye de 300 litros (lo recomendao pola OMS ye un mínimu de 100 l.)
Ente 180.000 y 200.000 palestinos nun tienen accesu a agua corriente.
450.000 colonos tienen tanto o más agua que 2,3 millones de palestinos de Cisjordania
(datos ufiertaos por Amnistía Internacional)

Pola so parte, na estaya de Gaza, el 90% del agua del acuíferu costeru ta contaminao por mor de la filtración d’agües residuales y de la mar, pero’l bloquéu impuestu por Israel torga qu’entren los materiales empobinaos a la reparación de les instalaciones de suministru y tratamientu del agua.

agua1

Too esto ta asocediendo col silenciu culpable de los Estaos Xuníos y de la Comunidá Internacional, que paez que tán esperando a que’l problema del Oriente Mediu se resuelva solu: cola desapaición física del pueblu palestín, no que, nun alcuentro otra forma de llamalo qu’un verdaderu xenocidiu. Pero eso sí, cada poco los xudíos vuelven a sacar a rellucir el tema del so «xenocidiu», que fue dalgo terrible, pero que nun debiere xustificalos pa cualquier atropellu que quieran facer nel futuru. Mentantu, los demás callamos.