Nun ye siempre cierto qu’una imaxen valga más que milenta pallabres. Ye más, hai veces qu’una pallabra val más que milenta imáxenes porque les pallabres, como dalgo abstracto, puen removenos sentimientos, recuerdos, sensaciones… Si por exemplo, yo digo «dolor», puedo interiorizar lo que pa min representa, los abondos «dolores» polos que pasé, y revivo lo que sintí n’aquellos momentos en que m’enllenaba. Asina, personalizo la pallabra, asúmola como mía. Nenguna imaxen, por impactante que seya (y hailes mui impactantes) pue consiguir el mesmu efeutu. Lo mesmo si digo «amor», o «infancia», o otres munches que van tocar siempre les mios fibres sensibles.
Pero sí ye verdá que n’otres munches ocasiones, les imáxenes falen por sí soles y puen sustituyir a eses milenta pallabres del dichu. Ésti ye un d’esos casos. Na imaxen qu’ufierto, entesacada del diariu «El Comercio», pue vese’l llocal qu’ocupó la sé del Principáu d’Asturies en Madrid. La «embaxadina» que, en tiempos en que paecía que nun s’acababen les perres, llantó na capital del reinu Areces «el gastizu». El llocal, vaciu, abandonáu, ye ocupáu per unos indixentes que faen d’él el so propiu llar. Ensin luxos, nin banderes. Cola so miseria a cuestes. Nel fondu, como alcordanza d’unos años de derroche, la pallabra que nos define: Asturies. Nunca, como nesti casu, esa imaxen val más que tou un discursu.
