Siempre fue un periódicu moderáu, tanto no político como no catalanista, con un calter liberal y mui enfotáu nun sólo nos problemes nacionales, sinón tamién los del estranxeru con un piñu de bonos corresponsales. Les sos páxines de cultura yeren dalgo más que’l rellenu que suel dedicar muncha de la otra prensa. Pero paez que «La Vanguardia» ya nun ye esa vanguardia de les clases medies catalanes, les del famosu «seny» que, talo que la tamién famosa «flema» inglesa, daba sentíu común a una sociedá dacuando axitada por problemes político-culturales. La polémica decisión d’echar a la cai al periodista asturianu Gregorio Morán, tres un fuerte desacuerdu, paez una medida dictatorial, caciquil y mui desafortunada.
La cosa principió cuando Morán, asidúu collaborador del periódicu, escribió un artículu criticando determinaes coses y a determinaes persones (al Conseller d’Interior fundamentalmente) del procesu catalán hacia la independencia. La direición nun taba d’alcuerdu y censuró-y l’artículu, lo que nun torgó’l so espardimientu peles redes. El periodista asturianu discutió publicamente esa censura, y ente tola tensión xenerada pol tema, tuvo un infartu. Y ye agora, entovia reponiéndose del infartu, cuando’l periódicu-y notifica’l so despidu.
Gregorio Morán ye un periodista honestu, investigador de persones y personaxes (Ortega, Adolfo Suárez…) y con un lúcidu ensayu sobre la Transición y el coste que tuvo pal pueblu español. Podrá, a veces, nun tase d’alcuerdu con elli pero nun paez que, a estes altures de la pelicula, los desacuerdos d’opinión se solucionen con un cese y más nes penoses circunstancies qu’arrodien al casu. Da la impresión que, como dicía enantes, La Vanguardia va camudándose en retaguardia.
