close
L’asturianu tamién ye divertíu

L’asturianu tamién ye divertíu

2013-12-28petit popPop piquiñín487Visitas

petit_popTuvi cola supernieta nel conciertu de «Pop piquiñín» nel Teatru Xovellanos esti día. Fue una tardi de fiesta y folixa. El llocal atarraquitáu de xente, nun sólo’l patiu butaques, sinón tamién el gallineru. L’ambiente guapísimu, festexeru y baillongu y el personal con gana pasalo bien. L’actu entamábalu l’asociación «Reciella, families pol asturianu» y a ellos hai que-yos apuntar l’ésitu. Entiendo que muncha xente de la que fue facíalo pol grupu, o pola música, o porque’l día taba atristayáu y con muga, pero’l casu fue que toos sintieron cantar, y cantaron, n’asturianu. Y que colos folletos que «Reciella» repartía fueron a enterase qu’hai un grupu xente mozo enfotáu en que la llingua d’Asturies nun muerra, y que pa ello faen coses interesantes, prestoses, divertíes, participatives… Los músicos ficiéronlo mui bien amosando que, ensin nengún esfuerzu, puen cantar lo mesmo que facíen pero n’asturianu. Agradézse-yos la bona intención. Total, un gran ésitu de «Reciella» y del asturianu. Namás faltó que tamién cantara David Guardado, que fizo de mayestru ceremonies con naturalidá y pocu «rollu». Gracies por ello. La supernieta pasólo guai.