Esti día 25 de payares conmemórase (más bien tendría que dicir «recuérdase) el día escontra la violencia sobre les muyeres. Too ye poco p’acabar con esa llácara que debería avergonzanos a tolos paisanos, porque la sociedá nun la ficieron sólo los maltratadores, sinon toos, por más que dalgunos siempre lluchamos por meyorala. Nesti día, digo, podríen alegase munchos argumentos oxetivos pa reivindicar la desapaición del maltratu y la igualdá d’homes y muyeres a tolos niveles. Lo que supondría, d’una vez por toes, l’esaniciu d’esi machismu tan afincáu na nuestra sociedá y que s’amuesa en cuasi cualquier fechu o comentariu que los paisanos facemos.
Asina, podría invocase a los Derechos Humanos, a la Ética, al Derechu a la Igualdá entre toles persones, a les resoluciones de los principales organismos mundiales, y un perllargu etcétera, incluídes eses organizaciones non gubernamentales que tanto y tan bien lluchen por esa igualdá, entovía non llograda. Pero yo tengo pa min unos cuantos argumentos, propios, quiciás non esportables nin aplicables a otros, pero que me funcionen pa baxame esa tentación na que munchos caen, de considerate superior a les muyeres que, en definitiva ye lo que supón ser machista. Yo, a mí mesmu báxome’l «bacilón» diciéndome:
1.- Conozco a muyeres, munches, que son más intelixentes que yo.
2.- Conozco a muyeres, munches, que son más hábiles que yo.
3.- Conozco a muyeres, munches, que son más resistentes que yo.
4.- Conozco a muyeres, munches, que ganen más dineru que yo.
5.- Conozco a muyeres, munches, que son más rápides que yo.
6.- Conozco a muyeres, munches, que son más fuertes que yo.
7.- Conozco a muyeres, munches, que son más cultes que yo.
8.- Conozco a muyeres, munches, que son meyores persones que yo.
Entós, ¿cómo coño puedo ser machista? ¿Cómo coño nengún paisanu pue ser machista? Namás los inorantes, o los babayos. Pues nun deberíemos dexar pasar nin un día más, en qu’estos sigan controlando la nuestra sociedá. Pensái un poco nello.
