Facía tiempu que nun diba al cine. Coyí pereza y, amás, eso de tener en casa una ufierta tan grande de películes nes meyores condiciones, produxo que m’entrare esa galbana qu’este dia, por fin, sascudí. Nun m’arrepiento. El dir al cine supón, nun sólo’l visionáu d’una película, sinón l’actu social de ponese un poco curiosu (yo siempre fuí al cine «un poco curiosu»), dir dando una revolada hasta la sala correspondiente, compartir un espaciu escuru y agradable con otres persones, y salir llueu cola compañera comentado la película delantre una caña, una botella vinu o un culín de sidra. Ye tolo contrario del actu «onanista» de quedase na casa solitaria viendo la «tele».
Total que fui cola parienta a ver «Lincoln». Por principiar pol final diré que me prestó. Ye, ensin dubia, una bona película que recueye un de los pocos momentos históricos de los EE.UU. Digo esto, como diría Felipe González, «ensin nenguna acritú», namás porque los EE.UU son un país mozu y la so prehistoria nun son los Neanderthales, sinón la Declaración d’Independencia de 1776. Y la so historia antigua nun son los Celtas o los Íberos, sinón l’abolición de la esclavitud cola Enmienda nº 13 a la Constitución en 1865, que correspuende, precisamente, al argumentu de la película de la que toi falando. La «peli» cuenta, entós, les vicisitúes que tuvo que pasar l’entós Presidente de los EE.UU pa consiguir que’l Congresu aprobare la famosa enmienda. Como marcu endolcante, la Guerra de Secesión, colos sos cientos de miles de muertos, anque más como oxetu de trueque p’algamar l’aprobación de la enmienda: Lincoln dicía que p’acabar cola guerra, había qu’abolir la esclavitú de los negros. Ante esi fechu consumáu, sedría más fácil que’l Sur cediere definitivamente y punxere fin a la guerra. La disyuntiva yera qu’había posibilidaes de finar la guerra poles armes en pocu tiempu, y si llegaba la paz ¿a quién-y importaba la llibertá de los negros? Por eso, anque fuere una traxedia, Lincoln prefería allargar la guerra hasta que s’aprobare la enmienda y, depués, finala poles armes o negociando.
Too esto deduzse del argumentu de la película, y supongo qu’asina sedría na realidá, pero nun consulté nengún llibru d’Historia pa ver si fue d’esi mou. Pal casu, dame igual. Nel desarrollu del guión, ta mui bien tratáu’l tema de la falta d’escrúpulos de dalgunos congresistes que «venden» el so votu favoratible por un puestu n’Alministración del Estáu. Pero, claro, si dalgunos se venden, ye porque otros (o seya, Lincoln y los suyos) los compraben. Tan importante-y paecía al Presidente l’aprobación de la enmienda, que nun duldaba n’emplegar tolos métodos pa ello.
Al meyor fin de la película, un fin, como dixi, mui interesante, collaboren grandemente los actores. Daniel Day-Lewis va
a ganar, seguro, l’Oscar. Será merecío. Ensin embargu, a mi paecióme un personaxe un poco «pantasmagóricu». Mientres los otros personaxes yeren de carne y güesu, cola so ambición, les sos trampes o la so honestidá, Lincoln paséase pola obra, inclusive físicamente, como si nun tuviere «encarnadura», como si fuere «etéreu». Un rostru cenicientu, una mirada torva, que nunca amira de frente, unos movimientos como si tuviere (qu’igual tenía) «xigantismu». O seya, que caminaba dando grandes pasos y cuasi como con «cadencia»… Tou él paecía un espectru que se movía ente mortales. Igual ye qu’asina lo quixo’l direutor, o trátase d’una impresión mía. El restu toos formidables. Sally Field, nun papel curtiu pero intensu, ta fenomenal, y Tommy Lee Jones, como siempre mui efeutivo, pese a un «pelucón» que-y mangaron que cuasi acaba col so papel. El restu, de los que nun recuerdo los nomes, a mui bon altor.
Dos coses namás me repunaron un poco, anque entiendo que fueren inevitables: la repetición de «frases históriques», en boca, nun sólo del Presidente, sinón inclusive en soldaos o criaes. Y el remarcar eses «frases históriques» con una musiquina de fondu, pa que nos diéremos cuenta de que yeren importantes. ¡Coime, ya lo sabemos, nun faen falta «fanfarries»! Total, lo dicho. Paga la pena allegase hasta’l cine y dir a ver a esti «Lincoln» en pantallona grande y con bon soníu. Do-y l’aprobáu a Steven Spielberg, pese a que últimamente ta d’un «politicamente correutu» que fiede. Prefería’l de Tiburón o Indiana Jones. Pero,bono, esta vez nun voi quexame…
