Cuasi tol mundu que s’autoproclama civilizáu amosó la so condena escontra l’atentáu yihaddista al selmanariu «Charlie Hebdo». Lo que tenía que dicir sobre’l casu yá lo dixi nel so día. Pero prestaríame güei matizar un migayu esi principiu inviolable pa toa sociedá democrática que ye la llibertá de prensa. Y lo primero que quiero dicir ye que los periódicos, que paez que ye onde reside esa llibertá -por eso ye «de prensa»- disten muncho de ser órganos puros que la defenden penriba de toles coses. Eso ye dalgo qu’ellos nun quieren aceutar, pero asina ye. Tres cada periódicu, polo menos les cabeceres más conocíes, hai abondos intereses económicos ya ideolóxicos que fai que les noticies apaezan d’un mou o otru, o que nun apaezan nunca. Neso reside’l poder que la prensa tien (llámasela’l «cuartu poder»). Asina, una mesma noticia interprétase de forma distinta según quién la dea. Xuégase tamién cola tipografía, l’espaciu onde apaez, los desmentíos casu que los hubiere… y la posibilidá del silenciu delantre socesos qu’a dalgunos puen paecenos d’importancia.
L’otru día’l diariu «El País», con fama de ser la biblia del demócrata, publicó en portada la noticia de que’l númberu tres de Podemos, Juan Carlos Monedero, «falseó la mayor parte de su curriculo académico«, amestando depués que, «profesores a los que cita como referencia niegan conocerle«. Paez que’l conxuntu d’evidencies de la falsedá d’esta noticia, y les protestes y rectificaciones que traxo, obligaron a la Defensora del Llector, doña Lola Galán, a incluyir nel númberu d'»El País» del 1 de Febreru una aclaración y una «pequeña» bronca a los responsables de la noticia y al propiu periódicu que, repito, en Portada, la dieren. Como agora puen consultase vía internet los númberos atrasaos, emplazo al que quiera lleer l’artículu enteru de la señora Galán, pero mui en resume, el periódicu negaba que’l susodichu Monedero tuviere de profesor invitáu nuna universidá alemana, y lo mesmo nuna en México. Les rectificaciones a la noticia de dambes universidaes, reconociendo que sí tuvo de profesor (na de Puebla, en México, per varios años siguíos), xunto cola información (negada pol periódicu) d’un trabayu pal Bancu Central Européu,
dieron al traste cola citada «des-información» del diariu madrilanu.
Tengo que dicir que’l señor Monedero nun me cai especialmente bien. Nun me gusten les sos maneres nos mítines (siempre pasáu d’actuación y con frases que me repunen), y nun pondría por él la mano en nenguna foguera, porque nun lu conozo lo suficiente, claro, pero lo que nun se pue ye xugar col prestixu y la dignidá d’una persona, publicando noticies mal contrastaes o dafechamente tendencioses. Eso nun ye llibertá de prensa sinón, cenciellamente, manipulación. Y tengo clara la postura del periódicu más vendíu d’España respeuto a Podemos. Pero nun se pue salir en manifestación, diciendo qu’ellos son «Charlie» y llueu manipular noticies al so interés. Son coses escluyentes.
P.D. Cuando diba a colgar esta entrada, siento qu’esi «sindicatu pantasma» que se llama «Manos limpias», va a denunciar al señor Monedero por falsificaciones y otres coses. Da la impresión que ye lo de siempre, unos llevanten la caza, y otros disparen.
