Lleo nel periódicu que morrió Juan Manuel Villa, un de los sobrevivientes d’aquella delantera del Zaragoza de los años 60 a la que se-y punxo’l nomatu de «Los cinco magníficos». Yeren otros tiempos. Tiempos nos que se xugaba con cinco delanteros: dos estremos, dos interiores que facíen d’enllaz, de los qu’un solía ser la fuerza y otru la calidá, y un delanteru centru rematador. Con un dibuxu que se bautizó como la WM (tres, dos, dos, tres). Un dispositivu táuticu que propiciaba’l fútbol d’ataque, con gran númberu de goles. La cosa venía de mui atrás, y falo de los años 30 y 40, onde otres delanteres famoses trunfaben con nomes como la delantera Eléctrica, que yera na menos que la del Uviéu (Casuco, Gallart, Lángara, Herrerita y Emilín) onde’l gran Lángara caltién tolos records de goles nacionales ya internacionales por partíu. Otra yera «los Stukas», del Sevilla, en comparanza colos aviones alemanes d’esi nome, o la delantera de Seda, del At. de Madrid de los años 40/50. Grandes xugadores que daben siempre espeutáculu.
Pues, como dicía, acaba morrer un d’aquellos míticos delanteros, quiciás nun de los más conocíos, que formaben los «magníficos» del Zaragoza, qu’asonsañaben la película de los 7 magníficos, lliderada por Yul Brinner. Canario, Santos, Marcelino, Villa y Lapetra, yeren los que la formaben. Canario, brasileñu de color (o seya negru), rápidu y bon centrador, Santos, home incansable, potente, que xubía y baxaba col balón enllazando colos delanteros. El gran Marcelino, rematador incansable, autor del famosu gol a la URSS que valió’l primer Campeonatu d’Europa a la España franquista. Villa, finu interior izquierda, de gran regate y visión del xuegu, y el zurdu Lapetra que, a la escontra de lo que se llevaba, xugaba dalgo retrasáu, al estil de Zagalo na seleición brasileña, lo que descolocaba muncho a les defenses. Otros tiempos, otros plantegamientos, otru fútbol. Muerre un d’aquellos que lu formaron y a los que siempre rindo homenaxe. Que la tierra-y seya leve a Juan Manuel Villa. Xugador de los d’antes.
